"Non o imos esquecer nunca porque o que vivimos foi indescritible, pero queremos pasar páxina"
Por Natalia Puga & Mónica Patxot
O 23 de maio de 2018, ás 16.15 horas, cambioulles a vida. A explosión dun almacén ilegal de explosivos da Pirotecnia La Gallega arrasou o seu pobo, Paramos, en Tui, e volatilizou tanto a nave na que estaba ese material como toda a contorna. Un matrimonio faleceu e resultaron afectadas 37 persoas e 446 parcelas.
Cinco anos e catro meses despois, finalmente, o caso chegou a xuízo. O dono da pirotecnia confesou os feitos e pediu perdón -"Sinto moito o ocorrido. E pido perdón"- e todas estas persoas ás que a vida lle deu un envorco poden empezar a pasar páxina.
Así o sinalou este xoves Salvador García, presidente da Asociación de Afectados de Paramos. Acudiu ao xuízo na Audiencia Provincial de Pontevedra en representación de todos os seus veciños e insistiu nesa necesidade de pechar un capítulo para poder seguir coas súas vidas.
As vivendas esnaquizadas pola explosión xa están restauradas, o ano pasado deron por pechada a reconstrución, e tan só quedáballes pendente esta vertente xudicial. "Os veciños o que queren é pasar páxina e esquecer todo", explicou.
O vivido foi moi intenso e recoñece que "este suceso non o imos esquecer nunca porque o que vivimos foi indescritible", pero si necesitan pechar xa todo o proceso xudicial, que pesaba como o recordo permanente do ocorrido.
Agora, pechar a vía xudicial permitiralles "non ter que lembralo constantemente, non ter que vivir aínda pendentes deste xuízo".
A nivel burocrático, ademais, como asociación, a directiva espera que haxa sentenza para poder repartir o diñeiro que segue aínda pendente relativo ás indemnizacións e "poder pechar a asociación e pasar páxina".
Relacionadas:
-
O acusado pola explosión da pirotecnia de Tui declárase culpable e arrepíntese: "Sinto moito o ocorrido. E pido perdón"
Por Natalia Puga & Mónica Patxot |
-
A xuízo en Pontevedra a explosión da pirotecnia ilegal que devastou Paramos (Tui)
Por Natalia Puga |
-
O malestar polas axudas pola explosión de Tui chega a Pontevedra
Por Alejandro Espiño |
-
VÍDEO.- Afectados pola explosión de Tui estalan ante a falta de acordo na Deputación: "Queremos unión"
Por Natalia Puga & Mónica Patxot |