As Forzas de Seguridade coordinan un dispositivo especial pola Festa do Marisco
Por Redacción
O subdelegado do Goberno en Pontevedra, Abel Losada, presidiu este mércores a Xunta Local de Seguridade no Concello do Grove, xunto o alcalde da localidade, José Antonio Cacabelos. Tamén asistiu o tenente coronel da Garda Civil, Óscar Grañas, ao fronte da Comandancia Provincial de Pontevedra, e outros responsables de Tráfico, da Policía Local e da seguridade municipal.
O encontro celebrouse co gallo do operativo de seguridade e tráfico que se despregará do 3 ao 13 de outubro con motivo dos festexos da 61ª edición da Festa do Marisco. Con todo, os responsables tamén analizaron as cifras de criminalidade da localidade durante os oito primeiros meses do ano.
Abel Losada revisou o operativo de seguridade e tráfico deseñado para o bo desenvolvemento destes festexos, que se baseará na posta en marcha de controis de circulación e operativos especiais nos accesos á localidade e na activación de controis de alcoholemia e drogas aos vehículos que se despracen ata a vila. Os axentes da Policía Local tamén velarán tamén por garantir o bo desenvolvemento das actividades festivas.
Como se indicou na xuntanza, a Festa do Marisco é unha das festas máis multitudinarias da provincia de Pontevedra e de Galicia, polo que a gran afluencia esixe dunha estreita coordinación en materia de seguridade e tráfico, malia que se trata dunha festa familiar pouco vinculada ao ocio nocturno, que non adoita rexistrar importantes incidencias.
Na pasada edición acudiron unhas 120.000 persoas, tal e como se rexistrou por vez primeira mediante a utilización de tecnoloxía Big Data que ten en conta a xeolocalización da telefonía móbil.
OS DELITOS DESCENDEN UN 2,2 % NO 2024
Na reunión tamén se analizaron as taxas de criminalidade do municipio desde xaneiro a agosto de 2024. O subdelegado salientou que "seguindo a tendencia provincial, este está sendo un bo ano no que respecta á criminalidade, xa que a cifra total de delitos descendeu no municipio un 2,2 % con respecto ao mesmo período do ano anterior".
Esta baixada se produce en todas as tipoloxías penais, xa que os delitos graves e menos graves baixan un 3,48 %, os delitos leves redúcense nun 1,27 %, e as infraccións administrativas rexistran unha descenso de case o 40%.
Relacionadas:
-
O 1 de outubro abrirá a campaña do libre marisqueo na Ría de Arousa
Por Oskar Viéitez |
-
O día en que o cárcere abre as súas portas para poñer o foco no seu "dificultoso" camiño diario cara á reinserción
Por Natalia Puga |
-
A criminalidade descendeu na provincia entre xaneiro e agosto
Por Redacción |
-
En xullo e agosto houbo 2,8 millóns de vehículos de paso pola provincia de Pontevedra, a cifra máis alta dende 2019
Por Oskar Viéitez |