Rebaixan a pena a un home condenado por abusar da filla de 10 anos da súa parella por non haber abuso de superioridade
Por Natalia Puga
O Tribunal Superior de Xustiza de Galicia (TSXG) decidiu rebaixar a condena inicialmente imposta a un home condenado por abusar da filla de dez anos da súa parella ao considerar que, neste caso, non se pode afirmar que houbese abuso de superioridade.
A sección segunda da Audiencia Provincial de Pontevedra condenouno a catro anos e dous meses de prisión como autor dun delito de abuso sexual, o acusado recorreu e agora o TSXG rebaixou esa pena a tres anos.
Segundo a sentencia, os feitos ocorreron no verán de 2019. A nena estaba sentada na cociña da súa casa e o acusado achegouse a ela e realizoulle tocamentos por fóra e por dentro do pantalón. Cando ela tentou zafarse, agarroulle a súa man e dirixiuna ata os seus propios xenitais, pero ela logrou soltarse e foise do lugar
O acusado na época dos feitos era parella sentimental da nai e residía de maneira intermitente no domicilio da menor. Como consecuencia destes feitos, e segundo informe médico forense, a nena sufriu trastorno por estrés postraumático leve que precisou 193 días de prexuízo persoal básico e que non lle deixou secuela.
Os maxistrados do TSXG estimaron en parte o recurso de apelación interposto polo acusado lembrando que o prevalimiento previsto no artigo 183.4 d) do vixente Código penal no momento dos feitos "ten como fundamento agravatorio o abuso de superioridade que no plano moral ten unha persoa que pon ao seu servizo unha condición ou calidade que instrumentaliza no seu beneficio particular con finalidade delituosa para cohibir a resistencia da vítima".
Neste caso, entende que os elementos obxectivos non conducen, por si mesmos, "ao aproveitamento da circunstancia".
A sentenza recolle que "non configura, en definitiva, unha conduta que supoña gozar daquela situación de vantaxe que non só anula o consentimento, o que no presente caso devén irrelevante pola idade da menor, senón que conduce a concluír con éxito o abuso precisamente en razón á situación de vantaxe que se aproveita".
O fallo xudicial recolle que os feitos os perpetra a parella sentimental da nai da menor, que entre eles non consta relación de dependencia algunha e "acontecen dun modo súbito e sorpresivo, sen que se expliquen en razón a aquela circunstancia de superioridade que os podería definir e, sobre todo, á vantaxe que tal situación comporta".
Contra esta sentenza cabe presentar recurso ante o Tribunal Supremo.