ENCE celebra a "gran acollida" da nova edición do seu Plan Social
Por Redacción
Máis de 150 proxectos presentaron a súa solicitude á nova convocatoria do Plan Social de Ence Pontevedra, lanzado o pasado 2 de setembro.
Dende a dirección da compañía pasteira destacan que este dato de participación pon de manifesto "o éxito desta iniciativa social" focalizada nos municipios Pontevedra, Marín e Poio.
Ence destina tres millóns de euros en cada convocatoria deste Plan o que o sitúa coma "unha das iniciativas sociais de maior envergadura levadas a cabo por unha empresa privada en España".
"Supón unha importante contribución en favor da integración social e a calidade de vida dos habitantes de Pontevedra e a súa comarca, mediante o desenvolvemento de accións de fomento da educación e o coidado do medio ambiente", aseguran desde ENCE nun comunicado.
O Plan Social de Ence en Pontevedra axudou a impulsar un total de 1.117 proxectos que inclúen actuacións capaces de detectar de forma prematura incendios a través do uso de sensores de gases; iniciativas de mobilidade sostible, mediante as "rutas-eco" de E-kletta; proxectos como a Aceleradora Ría de Pontevedra para promover o emprendemento e a innovación cara a modelos de negocio sostibles; iniciativas de reforestación e fixación de carbono de Probosque ou actuacións focalizadas en colectivos con diversas capacidades.
O martes 1 de outubro finalizará o prazo de presentación de solicitudes.
Desde Ence animan ás entidades ou persoas da comarca a que presenten os seus proxectos a través do portal web "Plan Social Ence Pontevedra - Compromiso coa sociedade", onde tamén se poden consultar as bases da convocatoria e obter máis información sobre edicións anteriores.
Así mesmo, través do correo, plansocialpontevedra@ence.es atenderán calquera consulta relacionada con esta iniciativa.