O Concello solicitará á Xunta que dea de baixa ás viviendas de uso turístico do centro histórico sen licenza municipal habilitante
Por Anxo Lourido
O concelleiro responsable da área de Urbanismo, Xaquín Moreda, informou da regulación das vivendas de uso turístico no conxunto histórico de Pontevedra, cuestión que este martes 24 foi á comisión de Urbanismo para revisar o artigo 65 do Plan Especial de Protección e Rehabilitación do Conxunto Histórico (PEPRICA).
A regulación establece que o uso turístico se regulará de forma análoga ao resto do Concello, permitindo actividades terciarias, neste caso de uso turístico, nas plantas baixa e primeira ou nos edificios completos.
Esta decisión está respaldada por unha sentenza do Tribunal Superior de Xustiza de Galicia (TSXG), que recoñeceu o uso turístico como unha actividade terciaria, criterio que se manterá na zona monumental.
A comisión aprobou por unanimidade o estudo da proposta para regular as vivendas de uso turístico, que será enviada aos colexios profesionais e tamén á Xunta de Galicia.
Todas as solicitudes de vivenda turística pasarán por unha comisión do PEPRICA para evitar problemas futuros, avanzou o concelleiro.
O informe presentado indica que actualmente hai noventa vivendas de uso turístico rexistradas no centro histórico, representando o 6,10% do total, a data de xuño deste 2024
O aumento de peticións de licenza para este uso está a incrementarse e xa foi detectada no anterior mandato.
Segundo explicaba Xaquín Moreda, o uso turístico repercute no incremento dos prezos de vivenda.
O Concello de Pontevedra está a preparar un estudo sobre o estado da vivenda.
Existe unha proposta para solicitar a Turismo de Galicia a tramitación de baixa das vivendas de uso turístico que carezan de título habilitante.
A Xunta de Galicia está a dar de alta como vivenda turística todas aquelas residencias que dispoñan de licenza de primeira ocupación.
O Concello solicitará á administración autonómica que elimine da listaxe aquelas que consten para uso turístico na zona monumental que se desenvolvan fóra das plantas baixa e primeira.
Desde a implementación do PEPRICA, o número de residentes no centro histórico experimentou cambios significativos, explicaba Xaquín Moreda.
En 2003, antes do PEPRICA, había 2.329 persoas e se estaba a rexistrar unha perda de poboación.
En 2011, cando se fixo a memoria para a Área de Rehabilitación Integral (ARI) indicaba 2.098 habitantes, mentres que en 2020, cando se regularon os criterios interpretativos do uso hosteleiro sobre o uso de hostelería, a cifra aumentou a 2.160.
Actualmente, en 2024, os informes indican un leve incremento, alcanzando 2.179 residentes, explicaba Moreda.
A modificación do artigo 65 manterá o espíritu de manter o uso residencial deste espazo da cidade e, segundo entende o goberno local, con esta modificación vai controlarse o uso que se faga das distintas plantas dos edificios.
Relacionadas:
-
O Concello de Pontevedra dá licenza de construción para catro apartamentos turísticos
Por Redacción |
-
Lores insta á Xunta para que regule as vivendas de uso turístico
Por Oskar Viéitez |
-
No centro histórico só se autorizarán vivendas de uso turístico en edificios completos, en baixos ou nos primeiros andares
Por Oskar Viéitez |