As demandas educativas irrompen no Pleno: "Máis ca unha clase, empezamos a considerala un aparcanenos"
Por Natalia Puga & Mónica Patxot
As demandas que manteñen activas as familias dos colexios A Xunqueira 1 e 2 de Pontevedra en relación coas ratios de alumnado por aula foron este luns protagonistas do Pleno da Corporación municipal celebrado no Teatro Principal.
Un grupo de familias do alumnado destes centros acudiu á sesión, na que se debateu e aprobou unha moción do PSOE para apoiar as demandas da comunidade educativa e reclamar da Consellería de Educación o desdobre das aulas de cuarto curso de infantil do CEIP A Xunqueira 1 e de quinto de infantil do CEIP Xunqueira 2.
A moción aprobouse cos votos a favor do PSOE e o BNG e a abstención do PP. Como resultado, o texto aprobado supón que o Concello de Pontevedra apoia a "xusta reclamación" dunha mellor atención e máis recursos educativos e docentes para estes dous centros, "con particular atención aos nenos e nenas con necesidades educativas especiais".
No exterior do Pleno, as familias valoraron a situación que están a vivir. Na aula de quinto de infantil de A Xunqueira 2 hai 24 alumnos e alumnas, ao límite da súa capacidade legal sen alumnado con necesidades educativas especiais, e tres deles están diagnosticados con trastorno do espectro autista (TEA), de maneira que, a efectos de calcular a ratio, son 27 nenos. Ademais, un cuarto está pendente de valoración.
En cuarto de infantil de A Xunqueira 1, hai 20 nenos, dos que dous teñen necesidades educativas especiais, que a efectos de ratio, coa nova norma anunciada pola Xunta de Galicia, computarían coma 23, polo tanto, 3 por riba do máximo de 20 por aula.
En nome destas familias, Iago Abeledo, de A Xunqueira 2, explicou que esta situación vai en contra da procura dun ensino "individualizado e de calidade" e que no seu centro faise "insostible".
"Creemos que se pode mellorar co simple feito de desdobrar esa aula en 2 de 12", sinala, de tal maneira que en cada aula habería dous nenos ou nenas con necesidades educativas especiais (NEE).
Como resposta ás súas demandas, a Xunta asignou para esta aula un profesor de apoio a media xornada. As familias consideran que é "un parche", pois vai á aula de martes a venres de 9.00 a 11.30 horas, e o resto da mañá, o docente responsable da aula "terá que sobrevivir como poida, dando unha docencia o máis axeitada posible".
Así, como exemplo, pide que se imaxine "o ruído, o barullo" de nenos levantándose, pedindo que lles aten os cordóns ou ir ao baño. "Case, máis ca unha clase, empezamos a considerala un aparcanenos", sostén este pai, que explica que este luns foron ao Pleno "buscando a axuda daquel que nos queira dar voz".
Deulles voz o PSOE en Pontevedra e o BNG no Parlamento de Galicia. No caso do Pleno municipal, o voceiro socialista, Iván Puentes, lembrou que "a ratio non é cuestión baladí, é unha cuestión de calidade educativa" e pide este desdobre das aulas para "garantir o máis básico", que os alumnos con necesidades educativas "poidan ter as mesmas oportunidades".
En nome do BNG, Demetrio Gómez agradeceu á comunidade educativa o seu "exemplo de solidariedade e de defensa do ensino público" e lembrou que se está a falar de nenos de 3 e 4 anos que "precisan unha atención individualizada, pormenorizada e baseada nos afectos, no cariño e na relación persoal coa súa profesora e profesor".
Polo PP respondeu á moción a concelleira Aroa Otero, que tirou de datos oficiais da Xunta para garantir que este curso se incrementou o persoal destes centros con cargo ao Plan Mega da Xunta.
Desde o patio de butacas, as familias acusaron a esta concelleira de dar datos "falsos" e de dicir "mentiras" e Iván Puentes quixo responderlle que "ten que pensar que estamos a falar de persoas con nomese apelidos, de familias que teñen fillos e necesidades educativas, non estamos falando de números".
Relacionadas:
-
Rifa política á conta do canon de Sogama mentres os partidos chegan a acordo para a ordenanza que sanciona cuspir na rúa
Por Natalia Puga & Mónica Patxot |
-
Venezuela, a pequena Amelia e Raquel Martínez, a concelleira de estrea
Por Natalia Puga & Mónica Patxot |
-
A Xunqueira 1, en loita: "Por que presumimos de que estamos a baixar as ratios cando á hora da verdade non é así?"
Por Natalia Puga & Mónica Patxot |
-
As demandas da comunidade educativa do CEIP A Xunqueira 2 chegan ao Parlamento da man do BNG
Por Oskar Viéitez |
-
Educación garante un reforzo do cadro docente na Xunqueira 2
Por Natalia Puga |
-
"Indignación" na Xunqueira 2 ao negarse o desdobre dunha aula con 24 alumnos e 3 con necesidades especiais
Por Natalia Puga & Mónica Patxot |