Remataron as obras de mellora da seguridade viaria na estrada EP-8004, entre Caldas e Vilanoviña
Por Redacción
Cun acto político púxose fin este luns ás obras realizadas ao longo dun treito de oito quilómetros na estrada provincial EP-8004, maioritariamente no termo municipal de Portas.
Participaron neste acto o presidente da Deputación de Pontevedra, Luis López; o alcalde de Portas, Ricardo Martínez; os deputados provinciais Isabel Couselo e Javier Tourís; e membros das corporacións municipais de Portas, Caldas, Meis e Vilanova, concellos que atravesa esta EP-8004.
Estes traballos supuxeron a achega de preto dun millón de euros por parte da Deputación para renovar o firme e a sinalización horizontal, e implantáronse pasos de peóns sobreelevados.
Esta obra complementa outra realizada con anterioridade en Meis para a construción dunha senda peonil e que terá continuidade nos vindeiros meses con actuacións enmarcadas nos plans provinciais de mellora de firmes ou de cunetas.
"Todo esforzo dá os seus froitos e aquí podemos ver a mellora dunha infraestrutura vital para a veciñanza así como a colaboración cos concellos para articular solucións a grandes problemas", manifestou o presidente da Deputación.