Preocupación na Escola infantil Crespo Rivas pola falta de conserxe durante o inicio de curso
Por Anxo Lourido & Mónica Patxot
"Hai uns días estragouse unha billa de auga e os profesores estiveron arranxándoa ao non haber conserxe".
Os docentes da EEI Crespo Rivas están multiplicando as súas funcións no inicio deste curso escolar ante a ausencia da figura do conserxe do centro, así o denuncian pais e nais que levan a diario aos seus fillos a esta escola infantil.
A anterior persoa que ocupaba este cargo obtivo unha praza noutro lugar e o 1 de agosto deixaba este centro situado en Campolongo.
O Concello de Pontevedra, tras dúas semanas desde o inicio do curso, aínda non enviou a ninguén que exerza estas funcións básicas nun centro ao que acoden diariamente 210 escolares, con idades comprendidas entre os tres e os seis anos.
A situación é preocupante para a xunta directiva da ANPA Anduriña do centro e reclama unha solución inmediata.
Sabela Díaz Amoedo, tesoureira da ANPA, indica que o conserxe ocupábase de garantir a apertura e peche das portas da escola, ademais de realizar tarefas de mantemento e limpeza.
"O outro día estiven vinte minutos agardando na porta ata que finalmente tiven que chamar a un profesor para que me abrise", explica esta nai que necesitaba recoller ao seu fillo e que se atopou con que ninguén respondía ao timbre.
Lembra que, en numerosas ocasións, é preciso recoller estes cativos antes da hora de saída e o profesorado non pode asumir outras tarefas fóra da aula.
"Cada profesor está pendente de 25 nenos e non poden estar atendendo outras situacións", explica a representante da ANPA, sinalando que a figura do conserxe é "fundamental" para garantir que as portas quedan debidamente pechadas e evitar así a saída destes nenos menores de seis anos do centro ou o acceso a zonas que poidan resultar perigosas.
"O que nos preocupa é que levamos doce días de curso e non hai noticias sobre a incorporación dun novo conserxe", apunta Sabela Díaz.
Desde a ANPA queren dar unha marxe de tempo para que o Concello adopte unha solución. Do contrario, solicitarán unha entrevista co concelleiro responsable de Educación, Demetrio Gómez, e estudarán accións de protesta.