A do castelo de Soutomaior, unha vendima con preto de 13.000 quilos de uva
Por Redacción
A adega Quinta das Eiras finalizou os traballos de vendima nos viñedos da finca do castelo de Soutomaior, propiedade da Deputación de Pontevedra, cun total de 12.863 quilos de uva branca recollidos, oitocentos máis que a previsión inicial.
Ata dezaoito persoas participaron esta semana na colleita, realizada ao longo de varias xornadas nesta última semana.
Esta adega, que resultou adxudicataria na poxa pública promovida para realizar a vendima encargouse tanto dos traballos de colleita como do seu posterior traslado, e pagará 1,47 euros por quilo de uva albariña recollida e 1,05 euros para as outras variedades.
En concreto, dos case 13.000 quilos recollidos, 11.296 foron de uva albariña e 1.567 de godello.
Os viñedos do castelo de Soutomaior, que se estenden en catro hectáreas, foron plantados en 1984.
A explotación distribúese nunha parte con terreos tipo castel e en terrazas e outra sobre terreos húmidos, fértiles e con cuberta vexetal suficiente, o que fai que as producións non sexan moi altas.
A uva é autóctona, na súa maioría albariño, habendo outras variedades brancas como o godello, torrontés, loureiro e treixadura.