Galicia impulsa o emprendemento co foco no rural
Galicia impulsa o emprendemento como unha motor clave para o crecemento, a competitividade e a creación de emprego e riqueza.
O Goberno galego ten como unha das súas prioridades estratéxicas brindar todos os recursos e apoios necesarios ao ecosistema emprendedor, facilitando que aqueles interesados en iniciar un proxecto ou negocio atopen na rexión o respaldo necesario para levalo a cabo.
Grazas a isto, a Comunidade vén de ser nomeada como Rexión Emprendedora Europea 2025, un galardón comunitario que recoñece o esforzo da Xunta por desenvolver o potencial das catro provincias a través de iniciativas empresariais que impulsen a economía, atraian talento cualificado e fomenten novos negocios, contribuíndo así á fixación de poboación nas zonas rurais.
Neste contexto -ademais doutras medidas como a publicación de microguías útiles ou a creación dun Mapa do Emprendemento Virtual que reúne nun único espazo todos os recursos dispoñibles- un dos proxectos máis importantes ten sido a creación da Rede de Polos de Emprendemento e Apoio ao Emprego, unha iniciativa pública que viu a luz en 2022.
A rede ofrece, de maneira gratuíta, asesoramento personalizado tanto a persoas que desexan emprender na Comunidade como a aquelas que xa o fixeron e buscan consolidar os seus negocios.
Ademais, ten un enfoque particular nas zonas rurais, co propósito de impulsar as diferentes contornas e afrontar o desafío demográfico, aproveitando os recursos locais e establecendo sinerxías con outros axentes do territorio.
Na actualidade, conta con 14 oficinas distribuídas por toda Galicia e desde o seu lanzamento, os seus técnicos e asesores xa atenderon máis de 2.400 iniciativas emprendedoras, un 20% das mesmas lideradas por persoas de fóra da rexión.
Ademais, nas catro provincias xa se teñen levado a cabo máis de 6.600 titorías e 900 actividades, entre elas reunións con entidades locais, accións formativas e eventos, o que demostra a súa pegada e impacto social e económico.
IMPULSO AO EMPRENDEMENTO E Á REMUDA XERACIONAL EN PONTEVEDRA
A provincia de Pontevedra conta con dúas oficinas ao servizo do tecido emprendedor, situadas concretamente nos concellos de Silleda e O Porriño, ás que proximamente se lles sumará unha terceira, coa apertura dun novo laboratorio en Vilanova de Arousa. Entre ambas, xa son máis de 600 proxectos atendidos en diferentes etapas de desenvolvemento.
Ademais, sumando a actividade das dúas, destacan as preto de 1.400 titorías realizadas polos técnicos especialistas coas persoas emprendedoras, das cales un 60% son mulleres.
O abano de sectores predominantes nos que se encadran as propostas abranguen desde o sector servizos ata o da hostalaría ou o comercio, pasando polas actividades profesionais, científicas e técnicas ou o campo da agricultura, gandaría, silvicultura e pesca, unha ampla variedade que demostra as diferentes oportunidades que ofrece o territorio para as persoas que deciden iniciar a súa actividade por conta propia.
Entre os proxectos atendidos, tamén figuran os específicos de remuda, xa que a Rede de polos ofrece tamén un acompañamento para asesorar, axilizar e facilitar os procesos de transmisión de negocios en funcionamento establecidos no territorio galego para garantir a súa continuidade e evitar o peche por falta de persoas emprendedoras que os manteñan.
O programa permite, deste xeito, poñer en contacto a aqueles que venden ou alugan a súa empresa, con persoas interesadas en facerse cargo dela, apostando así por un proxecto empresarial consolidado e viable e reducindo os riscos da posta en marcha dun novo negocio.
Cómpre destacar tamén que a Rede de polos, no marco da Estratexia Retorna 2023-2026 -que, entre outros obxectivos, busca favorecer a integración sociolaboral dos descendentes que noutrora emigraron de Galicia- ofrece apoio tanto a persoas xa retornadas como a aquelas que, estando en orixe, contemplen o autoemprego como vía para o retorno. Trátase dunha medida que, ademais de combater o reto demográfico, permite seguir sumando talento e capacidades ao tecido produtivo da Comunidade. Os emprendedores retornados tamén contan co respaldo do programa de mentoría Merlo.
ATRACCIÓN DE NÓMADES DIXITAIS AO RURAL GALEGO
Tamén en Pontevedra, concretamente en Ponte Caldelas, se sitúa un dos tres coliving que forma parte do proxecto piloto impulsado pola Xunta para atraer nómades dixitais ao rural, outra iniciativa relevante no ámbito do emprendemento en Galicia que está a ser acollida con gran éxito.
Os nómades dixitais non son outra cousa que profesionais de diferentes perfís e sectores que traballan en remoto grazas ás posibilidades das novas tecnoloxías, o cal lles permite a oportunidade de explorar novas opcións no rural para desenvolver os seus proxectos, á vez que convivir e traballar en áreas comúns con outros emprendedores nestes chamados colivings.
A Xunta apostou por este modelo a través do convenio Fixar, que inclúe os coliving de Lobeira, en Ourense, iSlow, en Laxe (A Coruña) e o de Anceu, en Ponte Caldelas. Este proxecto piloto, desenvolto en colaboración coa Asociación Cultural Sende, conta con 60 participantes de perfís diversos, desde programadores ou enxeñeiros ata deseñadores, músicos ou artesáns. Grazas a esta iniciativa, poderán profundizar no espíritu e a filosofía do coliving rural, así como recibir mentorización que lles permita seguir impulsando os seus negocios.
VERTEBRACIÓN DO TERRITORIO A TRAVÉS DE ULTREIA
Finalmente, e como mostra do compromiso da Xunta co ecosistema emprendedor, sitúase a iniciativa máis recente impulsada polo Goberno galego neste eido. Trátase do programa "Ultreia Galicia Rexión Emprendedora", en colaboración coas confederacións empresariais de Ourense, A Coruña, Pontevedra e Lugo.
Financiado pola Unión Europea a través do Plan de Recuperación, Transformación e Resiliencia, o obxectivo deste programa é promover encontros de emprendemento nas catro provincias, identificar os sectores estratéxicos e os seus retos específicos, determinar as empresas tractoras de cada un deles e mapear os axentes do ecosistema empresarial de cada provincia implicados no seu desenvolvemento.
Tamén se pretende impulsar o debate sobre os retos que teñen por diante os principais sectores, na procura de solucións intelixentes e innovadoras para o territorio galego.