As orquestras Miramar e Marbella poñerán o toque musical ás Festas da Merced
Por Redacción
Poio xa está preparado para a celebración das Festas da Merced o luns e martes, 23 e 24 de setembro. Nelas está incluída a peregrinación nocturna e a actuación das orquestras Miramar e Marbella na Praza do Mosteiro.
Representantes da Orden Tercera de la Merced, organizadores da festa, presentaron a programación completa, acompañados polos edís de Festexos e de Cultura, Fran Dasilva e Natalia Sabarís.
As tradicionais peregrinacións nocturnas, que se recuperaron o ano pasado, sairán ás 22.00 horas desde o adro de San Salvador, da capela Virxe de Fátima de Campelo e desde a Igrexa San Roque de Combarro, para confluir as tres procesións no último treito do camiño e percorrer conxuntamente o traxecto ata o Mosteiro de Poio.
Tras a misa de medianoite, cantada pola coral San Xoán de Poio, comezará na Praza do Mosteiro a gran queimada e repartirase chocolate e rosca entre os asistentes. A música correrá a cargo da orquestra Miramar.
Xa o martes 24, festivo local e día grande da festa, a xornada arrancará con dianas e alboradas cos grupos Vides Novas e Escola de Música Tradicional de Poio. Ás 12.00 horas celebrarase a tradicional Misa da Vendimia, cantada pola coral de Combarro, e xa pola tarde, ás 19.00 horas, o Mosteiro de San Xoán acollerá a misa con procesión na honra da patroa, na que participarán a Banda de Música de Marín e o coro Virxe de Fátima de Campelo.
Pola noite, desde as 21.00 horas, a festa despedirase coa música da orquestra Marbella.