Comeza o arranxo da rede de abastecemento de auga da rúa de Cochón
Por Oskar Viéitez
O Concello de Soutomaior iniciará a vindeira semana as obras de arranxo da rede de abastacemento de auga da rúa de Cochón.
A actual rede ten máis de 25 anos e desde o momento mesmo da súa instalación xerou moitos problemas que se foron agravando ao longo do tempo pola falta de mantemento e por "un modelo de saneamento caótico". Só nos últimos dez anos esta rúa sufriu máis de 45 fugas e verteduras.
O alcalde de Soutomaior, Manu Lourenzo, sinalou que esta obra súmase a outras moitas actuacións que o goberno local está a acometer para dar arranxo ás importantes eivas coas que conta a rede municipal de saneamento e de separativas.
Todas estas actuacións desenvólvense ao abeiro do Plan Ría Viva, un proxecto municipal para poñer fin ás verteduras á Ría de Vigo causadas pola mestura das canalizacións de augas pluviais e fecais e a saturación da estación depuradora de Arcade.
Manu Lourenzo sinalou que "agora mesmo a situación da rede de saneamento supón un dos principais retos que ten o concello de Soutomaior por diante na vindeira década".
O alcalde solicitou colaboración ás diferentes administracións, como a Xunta de Galicia ou o Ministerio de Fomento, para seguir avanzando no Plan Ría Viva.