Claxxon, La Ola ADN, Kubo, Máster e Marbella farán bailar a Raxó durante tres días
Por Redacción
Raxó, parroquia do Concello de Poio, inaugura este venres 20 unha festiva fin de semana na honra da Virxe do Carme e da Saleta.
A comisión de festas preparou unha programación variada e pensada para todos os públicos que se estenderá ata o domingo.
As celebracións comezan esta noite coa verbena a cargo das orquestras Claxxon e La Ola ADN, que actuarán a partir das 22.00 horas na chaira ao carón do Centro Cultural Xaime Illa.
O sábado arrancará coa alborada polas rúas da man da Escola tradicional de Poio e do Grupo de teatro Galidanza.
Ás 17.00 horas celebrarase a misa cantada polo Coro da Virxe da Renda, seguida da procesión.
A Charanga 112 animará as rúas desde as 18.30 horas e a xornada rematará coa música das orquestras Kubo e Máster, esta última tras a tirada de fogos de lucería.
O domingo, último día de festa, comezará coa alborada da Escola de Música Tradicional de Poio e do grupo folk Os de Ningures.
Tras a misa solemne das 17.00 horas, terá lugar a tradicional procesión marítima, acompañada polo grupo folk Danzón.
A orquestra Marbella pechará as festas coa verbena nocturna.