Queixas do persoal sanitario do Salnés polo uso da ambulancia medicalizada do 061 con pacientes non críticos
Por Anxo Lourido
Persoal sanitario do distrito do Salnés da área sanitaria alerta sobre a situación "desafortunada" que se adoptou dende a xerencia en relación ao servizo de ambulancias na comarca.
Indican que a ambulancia medicalizada do 061 con base no Hospital do Salnés, que foi reformada recentemente, estase a utilizar para realizar traslados de pacientes non críticos entre hospitais.
Esta ambulancia, lembran, incorporábase en outubro de 2019 a esta comarca co obxectivo de atender as urxencias que requiran soporte vital avanzado de carácter extrahospitalario, ademais de realizar traslados medicalizados de pacientes críticos ingresados no Hospital do Salnés a outros centros para tratar casos complexos.
Explican que o Hospital do Salnés conta cunha ambulancia UVI móbil desde hai máis de dúas décadas e é a encargada de realizar a totalidade dos traslados de pacientes ingresados non críticos no centro que precisen ser derivados a outros centros.
Para este servizo, a UVI conta con persoal médico e enfermeiro do servizo de Urxencias do propio Hospital con gardas localizadas remuneradas para cubrir as demandas que se produzan.
O persoal que emite o comunicado, encabezado polo médico do 061, Javier Sanz Smith, advirte que, tras a visita do presidente da Xunta, Alfonso Rueda, e do conselleiro de Sanidade, Antonio Gómez Caamaño, os traslados medicalizados de pacientes ingresados no Hospital do Salnés a outro hospital de maior nivel asignáronse "practicamente na súa totalidade" á ambulancia medicalizada do 061.
Entenden que esta decisión supón que esta ambulancia estea "ocupada" realizando traslados de pacientes non críticos a Santiago, Vigo, A Coruña ou Ferrol.
Sinalan que desta forma, a ambulancia medicalizada dedica menos tempo á poboación da comarca para casos de gravidade por paradas cardio-respiratorias, infartos, ictus ou accidentes de tráfico ou laborais en rúas, domicilios ou centros de traballo da zona.
"Esta medida supón retroceder 5 anos no tempo, cando na comarca non se dispoñía do valorado recurso medicalizado do 061", advirten.
Os profesionais entenden que a decisión débese a unha "mala xestión" por parte de xerentes e coordinadores "debidas ás protestas de parte deste colectivo no verán pola disposición dos recursos" co desprazamento a Sanxenxo da ambulancia medicalizada do 061 durante os meses de verán.
Pregúntanse onde se está reinvestindo o orzamento que se utilizaba para os traslados secundarios de pacientes non críticos.
"O persoal sanitario non pide premios nin recoñecementos, pide coherencia e 'sentidiño', poñendo o foco na poboación que os necesita, non na comodidade organizativa dos 'servizos hospitalarios' e insta a quen proceda na Consellería ou quen teña o poder de decidir, revogue esta decisión absurda", demandan no escrito.
Piden o apoio de asociacións e colectivos para evitar que esta decisión sexa "irreversible" ao entender que afecta a unha poboación de máis de 100.000 habitantes que queda sen cobertura mentres a ambulancia medicalizada realiza estes traslados non urxentes.
Relacionadas:
-
Ferido un operario en Sanxenxo tras quedarlle a man atrapada nunha máquina
Por Redacción |
-
Galicia 'saca peito' do plan que abordou as "tensións sanitarias" durante o verán
Por Alejandro Espiño |
-
Sanidade presume de que "cumpre coas súas promesas" co regreso da ambulancia do 061 de Sanxenxo a Vilagarcía
Por Natalia Puga | Creada e actualizada
-
En setembro entrará en funcionamento a nova base da ambulancia medicalizada no Hospital do Salnés
Por Anxo Lourido |
-
A área sanitaria recoñece un incremento de pacientes en Urxencias durante os últimos días
Por Anxo Lourido & Mónica Patxot |