Atraca en Marín un mercante equipado con velas ríxidas de succión
Por Oskar Viéitez
O Porto de Marín recibiu este xoves ao mercante EEMS Traveller, buque equipado cun innovador sistema de propulsión.
Trátase dunhas velas ríxidas de succión que reducen o consumo de combustible e as emisións á atmosfera.
As velas van situadas a popa e cada unha delas ten unha altura de 17 metros.
Colaboran na propulsión do barco mediante o vento dispoñible durante a navegación. Isto proporciona un empuxe limpo á embarcación reducindo o consumo dos motores.
O funcionamento destas columnas ríxidas aseméllase ao das ás dos avións, posibilitando que o vento escorregue por elas e poida ser succionado por unha abertura que percorre toda a lonxitude da superficie e conseguindo un aforro de combustible de ao redor do 30%.
O EMMS Traveller é un barco de 90 metros de eslora, construído no ano 2000 nos estaleiros neerlandeses Tille. As velas de succión foron montadas hai apenas un ano en Bilbao tras efectuar unha serie de reforzos estruturais sobre o barco. Chegou a Marín esta semana para realizar unha operativa de carga de madeira.
Marín xa foi este ano o primeiro destino español para a operativa do bulk carrier Pyxis Ocean, un buque granelero equipado con enerxía de propulsión eólica, sendo o primeiro buque cargueiro construído con tecnoloxía que permite aproveitar a forza do vento para aforrar un 30% de combustibles fósiles, reducindo así notablemente a pegada de carbono emitida durante a súa navegación e facendo máis sostible o tráfico marítimo de mercadorías.