Pontevedra despide o verán con choivas e treboadas
Por Oskar Viéitez
O outono comeza oficialmente o domingo ás 14.44 horas. A despedida do verán será tormentosa en Galicia. Tanto a Aemet como Meteogalicia activaron avisos amarelos por treboadas para este venres.
Un embolsamento de aire frío en altura fará que teñamos inestabilidade atmosférica con choiva localmente forte acompañada de aparello eléctrico.
Como aspecto positivo, o cambio do tempo contribuirá a mellorar a calidade do aire, que este xoves marcou niveis preocupantes debido ao fume dos incendios procedente de Portugal.
De modo que aumenta a inestabilidade atmosférica o venres. Segundo detalla a previsión de Meteogalicia, pola mañá teremos ceos con intervalos de nubes e claros e néboas no interior e con chuvascos tormentosos na metade sur. Pola tarde os chuvascos serán localmente fortes e xeneralizados, menos probables no litoral. As temperaturas continuarán sen cambios ou con lixeiros descensos. Os ventos soprarán frouxos de dirección variable, moderados do nordés no litoral norte.
O sábado aproximarase a Galicia un embolsamento de aire frío en altura e unha baixa en superficie. Será así unha xornada marcada pola inestabilidade atmosférica, de ceos parcialmente nubrados e de chuvascos localmente tormentosos, máis probables pola tarde no interior. As temperaturas máximas sufrirán un moderado descenso. O vento soprará frouxo do nordés no litoral norte, e do suroeste no interior.
O domingo Galicia queda na influencia dun centro de baixas presións pouco profundo centrado ao norte. Espérase unha xornada de ceos parcialmente nubrados con chuvascos ocasionais máis probables no interior e pola tarde. As temperaturas apenas terán cambios. O vento soprará frouxo de dirección variable con predominio do compoñente norte.
Para a semana que vén Galicia quedará influenciada polas baixas presións, polo que a probabilidade de precipitación será alta en toda a Comunidade especialmente a mediados da semana, con progresivo descenso das temperaturas.