O Porto de Marín recupera o tráfico de froita cunha liña semanal desde Brasil
Por Oskar Viéitez
O Porto de Marín volve entrar no circuíto marítimo de transporte de froita cunha liña semanal que comeza este luns 23 e que unirá o porto de Natal en Brasil con Marín, Rotterdam e Dover, de maneira que Marín será o primeiro porto europeo de escala neste roteiro transoceánico.
A carga é fundamentalmente melón e mango e a previsión é recibir unha media de 1.000 palés e varios contedores de froita en cada descarga. O primeiro barco que arriba a Marín con esta mercadoría é o Wild Lotus, mercante refrixerado de 150 metros de manga e 7 de calado.
O consignatario da mercadoría é a Axencia Marítima Davimar e a operativa de descarga realizarase en Davila Reefer Terminal, instalacións do Grupo Davila, situadas no Peirao Comercial Sur de Marín.
A navieira que realizará o roteiro entre Sudamérica e Europa é Cool Carriers, unha empresa fundada pola holandesa Seatrade en unión coa norueguesa Green Reefers.
Para o presidente da Autoridade Portuaria, Jose Benito Suárez Costa, a elección de Marín como porto de escala para esta campaña é unha gran noticia porque "se está a facer un importante esforzo para diversificar tráficos". Marín demostrou ao longo dos anos que é “un porto altamente competitivo e especializado con sobrada experiencia na operativa de mercadoría fresca como a froita”, engadiu o presidente.
Suárez Costa lembrou que este tráfico "require da participación de moitos axentes diferentes o que conleva un gran traballo de axilidade e coordinación de actividades ademais de operadores moi cualificados, algo co que conta o Porto de Marín".
O presidente manifestou a súa intención de seguir contactando con clientes de todo o mundo para dar a coñecer os servizos de alta calidade que presta o porto en tráficos refrixerados como a froita e a pesca conxelada, polo que participará nas próximas edicións das feras internacionais Conxemar e Fruit Attraction que se celebran en outubro.
VISITA DO CONSELLEIRO
Por outra banda, o conselleiro do Mar, Alfonso Villares, visitou este xoves o o Centro de Formación A Aixola, no Porto de Marín, acompañado pola alcaldesa da localidade, María Ramallo e representantes da Autoridade Portuaria.
A visita coincide co inicio dun novo curso e nela o conselleiro destacou a importancia da formación dos profesionais vinculados aos sectores do mar e da pesca. Tamén resaltou o labor que neste ámbito vén realizando A Aixola desde 1997.
O responsable autonómico puxo en valor o compromiso da entidade coa calidade educativa, reflectida nos resultados de inserción laboral do seu alumnado, que alcanza o 70 %.