As mareas vivas deixan imaxes espectaculares... e algún susto en Corbaceiras
Por Oskar Viéitez
A intensidade das mareas vivas rexistradas durante estes días está a deixar imaxes moi rechamantes en todo o litoral.
A diferenza entre a baixamar e a pleamar superou no medio metro as habituais mareas vivas de equinocio de setembro, que tradicionalmente son as máis fortes do ano.
Os expertos explican que este fenómeno débese á coincidencia da lúa chea, a última gran lúa do verán que se coñece como Luna de Colleita, que avivou as mareas que son máis pronunciadas cando o Sol, a Lúa e a Terra están aliñados.
Este xoves pola tarde no peirao de Corbaceiras, os barcos quedaron practicamente ao mesmo nivel que o cemento, e a auga estivo moi preto de alcanzar a Ponte dos Tirantes. Algunhas praias foron engulidas polo mar.
Foron imaxes espectaculares da marea sen ter que lamentar grandes incidentes, salvo para os propietarios de dous vehículos aos que alcanzou a marea na zona do gremio de Mareantes.
Esperemos que este contratempo sirva de aviso para outros condutores pois este fenómeno prolongarase ata o venres.