Tachan de "manipulación e mentira" a proposta do goberno local de Poio para a bonificación do IBI
Por Oskar Viéitez
O grupo municipal do Partido Socialista no Concello de Poio amosou a súa "enorme sorpresa" pola bonificación do Imposto de Bens Inmobles (IBI) anunciada polo goberno local.
Os socialistas tacharon a proposta de "manipulación e mentira" logo de ter acceso ao expediente correspondente na Comisión de Facenda.
"O alcalde de Poio anuncia como unha bonificación histórica unha bonificación do IBI para familias numerosas do 40 %, cando na actualidade está bonificado ao 50 %", explican dende o PSOE.
"Pero a maiores, e aquí é onde está a trampa, establece uns ingresos inferiores a dúas veces o IPREM para poder ter acceso á bonificación (información fundamental que oculta), que está fixado en 7.200 euros anuais (7.200 x 2 = 14.400 euros) cando na actualidade a bonificación en vigor está limitada a 30.000 euros. Polo tanto, para poder acceder á bonificación o núcleo familiar ten que ter uns ingresos totais inferiores a 14.400 euros".
Os concelleiros do PSOE alertan de que gran parte das familias numerosas perderán a bonificación en vigor do 50%, "pois dificilmente unha familia numerosa, que como mínimo están integrados por 5 membros (2 proxenitores + 3 fillos) poden vivir con 14.400 euros ao ano". "Na práctica elimina a bonificación actualmente en vigor", insisten.
O PSdeG-PSOE de Poio alerta de que "non ten nada que ver co que anuncia a bombo e platillo, este anuncio é unha burla máis do Señor Moldes. Con este alcalde nada é o que parece, é incapaz de dicir a verdade sen manipular o discurso. E para colmo da burla, fai un cadriño onde por cada fillo a maiores aumenta un 10% a bonificación onde pon que con oito fillos bonifica o 90%. Como pode vivir unha familiar de oito fillos con 14.400 euros ao ano?. Co Señor Moldes sempre hai truco, nada é o que parece".
Por último, o grupo da oposición afirma que "o que debería de facer o alcalde é deixar de enganar aos veciños e veciñas e cumprir as súas promesas electorais, como a súa proposta estrela de baixar o IBI do 0,47 ao 0,43 nos tres primeiros meses do seu mandato, chegando a manifestarse en varias ocasións, para ver agora como non cumpre e aumenta o IBI".
Relacionadas:
-
O Concello destina preto de 300.000 euros a pavimentar diferentes viais de Poio
Por Oskar Viéitez |
-
O PSOE urxe a Portos de Galicia a execución inmediata da mellora do porto de Covelo
Por Oskar Viéitez |
-
O PSOE insta a Deputación a que active un plan extraordinario que dote de recursos os concellos
Por Oskar Viéitez |
-
O PSOE, máis aló de pedir unha saída da AP-9 en Portosanto, busca a mellora integral das comunicacións en Poio
Por Redacción |