Marín estrea unha canle de WhatsApp para facilitar a comunicación do Concello coa veciñanza
Por Oskar Viéitez
O Concello de Marín habilita desde este xoves unha canle de WhatsApp para facilitar a comunicación coa veciñanza, tanto no que respecta á participación cidadá como na capacidade de facer chegar a toda a cidadanía as novas e eventos que se desenvolven na vila.
A alcaldesa de Marín, María Ramallo sinalou que "a día de hoxe en prácticamente todos os estratos de idade, desde a xente moza á xente maior, teñen teléfono móbil e utilizan o WhatsApp na súa vida diaria".
Non se trata dun espazo para chatear nin para comunicarse co Concello, xa que non é o obxectivo da iniciativa. Trátase dunha canle unidireccional, na que ademais están protexidos os datos de todas as persoas que deciden seguir a canle, xa que non se comparten os contactos co resto de seguidores, como si acontece nos grupos de WhatsApp.
María Ramallo explicou que "para poder comunicarse co Concello, seguimos tendo as formas habituais: a través do rexistro físico e do teléfono, da sede electrónica e da web (en ambas temos apartados de queixas, avisos e suxerencias) e polas propias redes sociais, que si permiten esta interacción".
Para poder ser seguidor da canle, é abondo con premer nunha ligazón que estará dispoñible a través da web do Concello e nos distintos soportes de cartelaría que se colocarán pola vila, con QR escaneable.
Unha vez se preme na ligazón, hai que premer en "Seguir" e despois activar as notificacións premendo na campaíña, de tal xeito que ao noso teléfono cheguen as novidades que se vaian colgando.