As dúas liñas circulares e a liña lanzadeira de Sanxenxo tiveron unha media de 405 usuarios diarios
Por Redacción
O Concello de Sanxenxo fai un balance moi positivo da creación do primeiro servizo de transporte público municipal.
Segundo manifestou o alcalde, Telmo Martín, "trátase dun servizo que veu para quedarse e para os vindeiros veráns estudaranse novas fórmulas e melloras. Cremos que o transporte público é a solución aos problemas puntuais de tráfico na tempada estival na que medra de forma exponencial a poboación".
En colaboración coa empresa concesionaria Monbus e o departamento de Mobilidade do goberno galego, implantouse este servizo, integrado no sistema de tarifas único e bonificado da Xunta, desde o 22 de xuño ata o 8 de setembro con dúas liñas circulares e un bus lanzadeira.
Nos dous meses e medio que as tres liñas estiveron en servizo transportaron a 32.018 viaxeiros. Como era previsible o mes de agosto suma o maior número, en concreto 15.523 viaxeiros, mentres en xullo foron 12.804.
Agosto concentra a semana con máis usuarios do servizo, en concreto 3.969, entre o día 3 e o 9 de agosto. Tamén o día con máis viaxeiros corresponde ao xoves 8 de agosto con 843.
A media diaria nos 79 días que durou o servizo foi de 405 viaxeiros. As dúas liñas de bus circular suman 29.528 usuarios e, a pesar de que a cifra da lanzadeira, que conectaba o parque empresarial con Sanxenxo e Portonovo, foi moi inferior alcanzou neste período os 2.490 viaxeiros.
O goberno considera que este servizo contribuíu ao obxectivo de redución do uso de vehículos particulares e fomentou unha mobilidade máis sostible no municipio, á vez que prestaba un servizo a aqueles veciños que carecen de vehículo propio.
Relacionadas:
-
Preocupación en Tráfico polo incremento das alcoholemias positivas en Pontevedra
Por Oskar Viéitez & Mónica Patxot |
-
14.168 persoas utilizaron as novas liñas de autobús de Sanxenxo
Por Redacción |
-
Haberá 88 servizos de bus adicionais á semana entre Sanxenxo e Pontevedra
Por Oskar Viéitez |
-
58 paradas en dúas liñas circulares e unha lanzadeira conectarán o transporte en Sanxenxo
Por Redacción |
-
A partir do 22 de xuño Sanxenxo estreará un servizo de transporte urbano
Por Oskar Viéitez |