Este venres preestrean o documental sobre o conflito eólico 'Vidas Irrenovables' na Casa da Cultura de Amil
Por Anxo Lourido
A Casa da Cultura de Amil acollerá este venres 13 de setembro, ás 19:00 horas, a preestrea do documental 'Vidas Irrenovables', dirixido por Francisco J. Vaquero Robustillo.
Este evento, organizado pola plataforma Amil Sen Eólicos, pretende concienciar sobre os impactos da implantación das enerxías renovables no mundo rural.
'Vidas Irrenovables' é unha película de 90 minutos que aborda os efectos da transición enerxética nas comunidades rurais españolas.
O filme cuestiona se a implantación das enerxías renovables que se está a realizar é realmente ecolóxica e sostible, e denuncia o impacto negativo que pode ter sobre os ecosistemas, as economías locais e a vida das persoas que habitan no rural.
A través de declaracións de 47 persoas, entre elas científicos recoñecidos e habitantes de zonas afectadas, o documental expón a loita contra a instalación descontrolada de macroproxectos de enerxías renovables.
O filme está dirixido por Francisco J. Vaquero Robustillo, enxeñeiro e licenciado en Comunicación Audiovisual natural de Extremadura. Este é o seu segundo documental, despois de presentar 'Ganado o Desierto'.
Na rodaxe de 'Vidas Irrenovables' participou o colectivo Amil Sen Eólicos, que aporta imaxes do impacto que a construción do polígono eólico Acibal está a ter na zona, incluíndo a destrución de petroglifos no monte do mesmo nome.
Este colectivo traballa activamente na defensa do patrimonio natural e cultural da comarca e mantén unha oposición continua a este proxecto.
A preestrea de 'Vidas Irrenovables' en Amil é un evento insólito, pois será a primeira vez que se presenta un filme a nivel nacional nesta localidade, segundo indican desde a plataforma organizadora.
Relacionadas:
-
Ana Pontón, en Pontevedra: "Non queremos que se repita con Altri o que lle pasou a Pontevedra en pleno franquismo"
Por Alejandro Espiño & Mónica Patxot |
-
VÍDEO.- Esixen vixilancia no monte Acibal para evitar que continúen as obras do parque eólico
Por Anxo Lourido |
-
ADEGA presenta a demanda ante o TSXG pidindo a paralización inmediata das obras do parque eólico Acibal
Por Anxo Lourido |
-
Denuncian a aparición dunha pedra de grandes dimensións fóra da zona de obras do polígono eólico de Acibal
Por Redacción |
-
Expoñen un vídeo para denunciar o uso non autorizado de maquinaria pesada nos arredores de petróglifos do Monte Acibal
Por Anxo Lourido |