O BNG pide explicacións á Xunta por nomear directora xeral de Calidade Ambiental á parella dun directivo de ENCE
Por Redacción
O BNG pide explicacións á Xunta de Galicia e demándalle que rectifique o nomeamento da nova directora xeral de Calidade Ambiental e Sostibilidade, María José Echevarría.
O motivo que leva aos nacionalistas a facer esta petición é que considera "escandaloso e reprobable" este nomeamento porque Echevarría é a parella do director de Ence para Galicia, Antonio Casal.
Ademais, ven "sospeitoso" o cesamento de Ramón Martínez Voga só catro meses despois de acceder ao cargo.
O BNG rexistrou este xoves un conxunto de iniciativas sobre este asunto e o viceportavoz segundo do BNG, o pontevedrés Luís Bará, sinalou que este nomeamento pon de manifesto a "connivencia entre a Xunta e as grandes empresas do lobby enerxético e pasteiro".
Para Bará, este nomeamento tamén pon de manifesto "a relación privilexiada entre a Xunta do PP , Rueda en particular, con Ence", evidenciando as "portas xiratorias de dobre dirección entre o PP e Ence".
"Estamos ante un exemplo manifesto de conflito de intereses e de incompatibilidade polas actividades empresariais do seu marido", sinala Bará.
A nova directora xeral "terá que intervir en procedementos que lle afectan directamente á empresa do seu compañeiro", sinalan desde o BNG. Como exemplo, falan da autorización ambiental integrada, o proxecto de interese autonómico de ampliación das instalacións de Lourizán (actualmente en tramitación), o seguimento do pacto ambiental asinado entre a Xunta e Ence, ou o novo proxecto industrial que promove esta empresa nas Pontes.
Igualmente, sinalan que terá intervir e informar sobre proxectos industriais da competencia de Ence.
Relacionadas:
-
A APDR rexeita a designación de Echevarría como directora xeral de Calidade Ambiental
Por Anxo Lourido & Mónica Patxot & Cristina Saiz |
-
O Constitucional non admite o recurso do Estado contra a prórroga de ENCE
Por Oskar Viéitez & Mónica Patxot | Creada e actualizada
-
ENCE abre en setembro o prazo para solicitar as axudas do seu plan social
Por Anxo Lourido |
-
Os químicos galegos premian á fábrica de ENCE pola súa sustentabilidade
Por Redacción |
-
ENCE incorpórase á Alianza polo Clima de Galicia e anuncia a presentación do plan estratéxico a primeiros de 2024
Por Mónica Patxot & Anxo Lourido |
-
O Plan Social de Ence Pontevedra beneficiará 306 proxectos
Por Redacción |