Internet con 100 megas en todos os xulgados pontevedreses
Por Redacción
O 100% sedes xudiciais da provincia de Pontevedra ten acceso a Internet con 100 megas de conexión. Ocorre nos xulgados da Parda e a Audiencia, pero tamén nos edificos de A Estrada, Cambados, Cangas, Caldas de Reis, Lalín, Marín, Ponteareas, Porriño, Redondela, Tui, Vilagarcía de Arousa e Vigo.
Segundo a información facilitada pola Xunta de Galicia, esta mellora da conectividade dos xulgados posibilitouna a Axencia para a Modernización Tecnolóxica de Galicia (Amtega) grazas á posta en marcha do Plan de Banda Larga de Galicia.
O citado plan permitiu dotar de conexións con velocidades de 100 megas a 35 edificios das 45 sedes xudiciais existentes nas catro provincias galegas, sendo Pontevedra a máis avanzada neste senso. Na Coruña esta tecnoloxía está dispoñible no 78% das sedes xudiciais, en Ourense nun 55% e en Lugo nun 66%.
A implantación de redes de 100 Mbps permite multiplicar por 10 a velocidade de baixada e quintuplicar a velocidade de subida. Deste xeito os empregados dos xulgados poderán ter un acceso máis efectivo á Rede, sen esperas ou contratempos; poderán conectarse simultaneamente un maior número de usuarios; e permitirá o funcionamento de máis aplicacións informáticas cun tempo de resposta adecuado.
Con esta actuación búscase dotar tanto ás cidades como ao rural da mellor conectividade posible, e avanzar na modernización da xustiza con iniciativas como o Plan Senda para introducir as TIC no eido xudicial galego, que leva investidos investidos 13,7 millóns de euros no período 2009-2012. As medidas do Plan abranguen a mellora das infraestruturas de telecomunicacións das sedes xudiciais, a implantación e actualización dos sistemas de información.