Este sábado celébrase no Gafos a noite europea dos morcegos
Por Oskar Viéitez
Este sábado 31 de agosto celébrase a noite europea dos morcegos e a asociación ecoloxista Vaipolorío desenvolve unha xornada de captura, estudo e explicación das características destes animais en colaboración coa Asociación Morcegos de Galicia, dentro das actividades de Ponteverán, que promove o Concello de Pontevedra.
Ao longo da noite do sábado integrantes de Morcegos de Galicia, especialistas no estudo destes mamíferos, ofrecerán datos sobre estes animais e desmitificarán as falsas lendas que existen sobre eles. Ademais, as persoas que participen terán a oportunidade de escoitar os sons que emiten.
Esta actividade leva anos celebrándose en sesión nocturna na contorna do río Gafos nesta data coa intención de achegar coñecemento sobre os morcegos á poboación máis nova.
O obxectivo é achegar ao público o mundo dos morcegos e as técnicas que utilizamos no seu estudo. Deste xeito, os expertos da Asociación Morcegos de Galicia fan observacións de emerxencias á noitiña, aprenden a escoitar e identificar a actividade dos 'morcegos' polas súas emisións ultrasónicas e, se as circunstancias permíteno, capturan algúns exemplares para identificalos en man e tomar algúns datos biométricos e fisiolóxicos.
Ata agora foron identificadas tres especies na contorna do Gafos: o Pipistrellus pipistrellus (Morcego enano), o Myotis daubentonii (Morcego das ribeiras) e o Eptesicus serotinus (Morcego das hortas).
Para esta actividade hai dispoñibles 25 prazas. Poden participar todas as persoas desde os 8 anos de idade, os menores deberán inscribirse con algunha persoa adulta acompañante.
A actividade desenvolverase das 21 ás 23 horas no senda rural do río dos Gafos.