Nin a choiva desluciu a primeira xornada da Punkativada
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Éxito de participación na primeira xornada da Punkativada 2024 de Soutomaior. Aínda que o tempo non acompañase durante a mañá, nin a choiva logrou deslucir a cita festiva e as familias colleron o seu paraugas para a achegarse ata o Multiusos e Arcade e gozar do sábado nesta segunda edición do evento.
O día comezou co ‘obradoiro creativo punki’ que tivo moito éxito entre pequenas e pequenos e tamén entre nais e pais que se animaron a prepara o seu “total look máis punki” para esta xornada. Dentro desta preparación o que máis gustou sen dúbida foi a maquillaxe e a perruquería.
Tras o obradoiro chegou o momento da actuación do grupo ‘As Tareixas’, que conseguiron meter ao público no peto coa súa música e alegría entre a que non faltou un dos seus temas máis famosos que é ‘ A cadeira da avoa’.
A continuación, chegou a quenda do directo de `Silforiña’ de Golfiños onde cos seus ritmos e corografías conseguiron poñer en pé a todo o auditorio.
A choiva xa non fixo acto de presenza pola tarde, pero a cita mantívose igualmente no multiusos. Os Hell Brothers de Cirkompacto foron os encargados de abrir a programación no Multiusos que deixou a todas e a todos abraiados cos seus saltos e acrobacias circenses.
Rematada a actuación, os protagonistas foron ‘os xogos de paporrubio’ e o concerto Singular de Píscore pechou programación do primeiro día. Os ritmos musicais, a comedia xestual, o clown.... fixeron que fose un éxito cun cheo absoluto no auditorio do Multiusos.
A programación retomouse este domingo na Carballeira do Peirao. A xornada comezou co obradoiro creativo de 'Palabras encadeadas' unha cita onde se van a encadear palabras para que non se perdan creando unha peza artística con elas e así de xeito lúdico non perder o vocabulario que non usemos.
A continuación. chegou un dos platos fortes desta edición co concerto da Gramola Gominola, unha banda de auténtico Rock&Roll en galego con Paco Cerdeira (Pakolas, Zenzar), Paula Romero (De Vacas, Coro Encaixe), Anxelo de Xermar (Festicultores Troupe) e Rodrigo Muñoz (Di elas, Lacón con Grelos).
Xa pola tarde, terá lugar un fin de festa por todo o alto co espectáculo ás 17:00 horas de Peterpunk e o neno imperdible protagonizado por Peter Punk e Brais das Hortas.
Sábado da segunda edición da Punkativada
Primeira xornada da segunda edición da Punkativada, un sábado no que os máis pequenos foron os protagonistas en Soutomaior, con concertos infantís, espectáculos, contacontos e obradoiros no Multiusos de Arcade
© Concello de Soutomaior