Patrimonio dá luz verde ao proxecto básico de rehabilitación de Santa Clara
Por Cristina Saiz & Anxo Lourido
A Deputación de Pontevedra deu un paso importante no proxecto de rehabilitación do antigo convento de Santa Clara, tras recibir o "ok" de Patrimonio ao proxecto básico presentado polo estudo arquitectónico Nieto Sobejano.
O vicepresidente da Deputación, Rafa Domínguez, anunciou este mércores que, grazas ás negociacións mantidas coa empresa gañadora do concurso, se alcanzaron acordos fundamentais que garantirán a preservación do patrimonio histórico e a integración do recinto na contorna.
Entre as melloras acordadas, destaca a eliminación do Centro Arqueolóxico proxectado inicialmente, unha proposta que, segundo Domínguez, "vandalizaba a zona verde do convento e non permitía o acceso público a estes espazos naturais".
En lugar de construír o centro no corazón de Pontevedra, a solución proposta situará o almacén noutro lugar, respectando así a integridade dos xardíns históricos, explicaba Domínguez.
A firma arquitectónica comprometeuse a adaptar o proxecto para que este novo espazo cumpra cos obxectivos de xestión, conservación e documentación, ao tempo que preserva a zona verde existente, segundo explicou o vicepresidente provincial.
Ademais, abordouse a revisión de elementos arquitectónicos existentes no recinto, co obxectivo de minimizar as intervencións que poidan afectar o valor histórico do conxunto.
"A destrución de construcións de épocas pasadas só se considerará adecuada se é esencial para a correcta interpretación histórica e cultural do Museo", afirmou Domínguez.
Esta medida busca garantir un respecto máximo ao edificio e a súa contorna histórica, asegurando que calquera intervención sexa o menos invasiva posible, indican desde o goberno provincial.
Outro punto clave das negociacións foi a revisión do acceso ao convento, en particular a dimensión da marquesiña proxectada na entrada dende a praza de Barcelos.
A Deputación solicitou unha revisión deste elemento para evitar que destaque en exceso sobre os edificios orixinais, propoñendo un estudo máis detallado das preexistencias na zona.
Rafa Domínguez: "Este proxecto é unha aposta firme pola preservación do noso patrimonio e pola integración da modernidade nunha contorna histórica"
A empresa aceptou reflexionar sobre este aspecto para garantir unha integración no espazo co estudo dunha rebaixa do tamaño.
Por último, Rafa Domínguez destacou que, a maiores destes acordos, a Deputación xa solicitou a licenza de obra ao Concello de Pontevedra o pasado 22 de xullo.
O Concello dispón de tres meses para dar unha resposta. Cando se licite o proxecto será cando se volva revisar economicamente a proposta inicial de 21,5 millóns de euros previstos para executar a obra.
"Este proxecto é unha aposta firme pola preservación do noso patrimonio e pola integración da modernidade nunha contorna histórica", subliñou o vicepresidente, quen tamén agradeceu a colaboración de todas as administracións implicadas: Deputación, Xunta e Concello de Pontevedra.
Segundo Domínguez, o proxecto de Santa Clara vai a "bo ritmo" e, cando se execute, situará a Pontevedra como un epicentro cultural e histórico a nivel internacional que atraerá a numerosos visitantes.
Relacionadas:
-
Reclaman á Deputación documentación necesaria para tramitar a licenza da reforma de Santa Clara
Por Anxo Lourido & Mónica Patxot |
-
Domínguez ve a Lores "frustrado" por Santa Clara e censura o seu "doble rasero"
Por Alejandro Espiño |
-
"Sorpresa maiúscula" porque o novo proxecto de Santa Clara é "exactamente o mesmo" que o presentado fai quince meses
Por Oskar Viéitez & Cristina Saiz | Creada e actualizada
-
Darán "máxima axilidade" á licenza para a rehabilitación de Santa Clara, pendente de nova documentación
Por Natalia Puga |
-
A Deputación limpará de maleza o muro perimetral do convento de Santa Clara
Por Redacción |
-
Corenta persoas estrean a nova xeira de visitas guiadas a Santa Clara
Por Redacción |
-
A reforma da parte central de Barcelos, supeditada á apertura da entrada a Santa Clara
Por Alejandro Espiño |
-
A Fundación RIA, de David Chipperfield, organiza unha visita de arquitectos a Santa Clara
Por Redacción |
-
O antigo convento de Santa Clara contará con dous novos puntos de acceso despois da súa rehabilitación
Por Oskar Viéitez & Mónica Patxot |