A reforma do pavillón polideportivo de Vilalonga encara a impermeabilización
Por Redacción
O Concello de Sanxenxo continúa coas obras de reforma do pavillón polideportivo de Vilalonga. Un proxecto que conleva un investimento de máis de 250.000 euros a través dun convenio coa Consellería de Presidencia, Xustiza e Deportes.
Na fase actual procédese á impermeabilización e illamento térmico exterior do edificio coa construción dun muro e unha soleira de formigón perimetral. Seguidamente farase un revestimento do inmoble con chapa metálica.
Previamente, os traballos interiores consistiron na substitución do chan e das portas de vestiarios e acceso aos aseos, cambio da iluminación, mellora dos espazos, instalación dun sistema de renovación do aire, ampliación do ximnasio e dotouse dun vestiario para árbitros. Queda por completar co pintado de zona de xogos, ximnasio e escaleiras, así como a pavimentación destas e do ximnasio situado baixo a bancada.