Invasión corsaria nas rúas de Marín
Por Diego Espiño & Cristina Saiz
Celebración pirata en Marín este sábado 17 de agosto co día grande da Festa Corsaria 2024.
A vila vestiu as súas mellores galas para gozar dun evento que está xa plenamente consolidado xa no calendario festivo da comarca.
A xornada arrancaba ás 11.30 horas cunha programación que se prolongaba ata a madrugada e que contaba cun mercado corsario, obradoiros, atraccións infantís, pasarrúas e animación continua.
O bo tempo animou aínda máis a participar nunha Festa Corsaria que contou con máis de 1.300 persoas comendo nas mesas habilitadas na rúa, segundo cifras do goberno municipal, con máis de 70 mesas montadas por particulares e a trintena de establecementos hostaleiros involucrados.
A eles sumáronse veciños e visitantes que, vestidos de pirata ou simplemente acompañando a celebración, gozaron da xornada na que Marín regresaba por unhas horas aos séculos XVIII e principios do XIX coas xestas de Juan Gago de Mendoza.