Detido por un altercado en plena rúa: tira cadeiras de dúas terrazas e enfróntase á Policía
Por Natalia Puga
A Policía Nacional detivo esta semana a un home que supostamente a emprendeu contra outro en plena rúa na contorna do Hospital Provincial, empezou a tirar cadeiras de dúas terrazas e finalmente enfrontouse a varios axentes policiais que acudiron para intervir no altercado.
Todo ocorreu na tarde do pasado mércores, 14 de agosto, na contorna do Hospital Provincial da rúa Loureiro Crespo.
Segundo a información á que tivo acceso PontevedraViva, o altercado comezou cando este home empezou a increpar a outro que ía pola rúa coa súa parella. O individuo estaba moi alterado e empezou a insultar a este home, ao que supostamente non coñecía de antes.
A continuación, sen motivo aparente, empezou a tirar varias cadeiras que había en dúas terrazas de locais de hostalería da zona.
Ante esta situación, deuse aviso do ocorrido á Policía Nacional e presentáronse na zona varias patrullas. Á súa chegada, aínda se puxo máis violento e enfrontouse aos axentes, resistíndose á acción policial.
Segundo confirmaron fontes oficiais da Comisaría, o home acabou detido polos delitos de resistencia, desobediencia e atentado a axente da autoridade.