Reunión en Barro para abordar a situación crítica da sanidade no municipio
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/425/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/66bc9946d3-reunionalcaldeconportavoces.jpeg)
© Concello de Barro
O alcalde de Barro, Xosé Manuel Fernández Abraldes, convocou unha reunión de portavoces dos distintos grupos municipais con representación na corporación para abordar a situación que consideran "preocupante" do servizo sanitario no centro de saúde do municipio durante este verán.
Ao encontro asistiron Roberto Rivas, portavoz do BNG, José Sanmartín, portavoz do PSOE, e Eduardo Ruadas, portavoz do PP, coa única ausencia do portavoz de PX’s, José Antonio Landín.
Na reunión, constatouse unha preocupación unánime pola deficiente atención sanitaria que se está a prestar en Barro, segundo informan desde o Concello.
A situación vén agravándose ano tras ano, indican, xa que non se cobren as vacacións dos profesionais de medicina de familia, o que provoca que cando un dos titulares está de vacacións, o outro profesional debe facerse cargo da totalidade da poboación, xerando retrasos e complicacións na atención.
Este ano, a situación empeorou debido á recente xubilación dun dos profesionais, deixando o centro de saúde cunha soa médica.
Cando a traballadora non está dispoñible, o centro queda practicamente desatendido, denuncian desde o Concello, xa que só se envía unha persoa a media xornada para atender todos os pacientes, o que fai que só se poida dar cita a un número moi limitado de solicitudes.
Como consecuencia, moitos veciños e veciñas vense obrigados a desprazarse ao PAC de Pontevedra para recibir atención médica.
Ante esta situación, o alcalde e os portavoces municipais acordaron dirixirse á xerencia da Área Sanitaria Pontevedra-Salnés para solicitar a cobertura urxente e definitiva da praza vacante por xubilación.
Ademais, solicitarán que, no caso de que se volva producir unha situación na que ningún dos facultativos titulares poida prestar servizo, a persoa substituta sexa contratada a xornada completa e non parcial, para poder atender o maior número de citas posibles e garantir unha atención de calidade para a poboación de Barro.
Relacionadas:
-
A área sanitaria recoñece un incremento de pacientes en Urxencias durante os últimos días
Por Anxo Lourido & Mónica Patxot |
-
José Flores, xerente da área sanitaria: "Non temos médicos de familia agora en paro para cubrir as vacacións dos titulares"
Por Mónica Patxot & Anxo Lourido |
-
José Flores, xerente da área sanitaria, explica que a falta dun médico en Barro "é unha situación como a de calquera verán"
Por Redacción |
-
O PSOE de Barro convocará unha protesta se a Xunta non repón urxentemente un médico para o centro de saúde
Por Redacción |
-
O novo centro de saúde de Barro terá enfermería pediátrica e unha área da muller
Por Redacción |