As primeiras actividades de Ponteverán 2024 colgan o cartel de completo
Por Redacción
As primeiras actividades de Ponteverán 2024 xa están en marcha e tres delas colgaron xa o cartel de completo. Trátase do campamento urbano ‘Xogando coa música’ no Local de Música, o campamento de cociña ‘Saborea Verán!’ na Casa da Luz e o curso de iniciación ao piragüismo na praia de Ponte Sampaio.
Ponteverán é un programa municipal de lecer educativo para a mocidade e adolescencia pontevedresa e cada ano é unha das iniciativas do Concello de Pontevedra máis agardadas e de maior éxito. Este ano, volveuse confirmar.
Durante a primeira semana de xullo, hai en marcha catro actividades distintas. Ademais das tres citadas que teñen todas as prazas cubertas e medio cento de participantes, hai unha cuarta, o curso de informática ‘Libreoffice’ que se celebra na Casa da Luz.
Este programa promovido desde a área de Xuventude do Concello oferta actividades culturais e de lecer educativo para a mocidade e adolescencia entre os 8 e 35 anos co obxectivo de adquirir novos coñecementos e favorecer o desenvolvemento persoal a través de valores positivos como a inclusión, o respecto, a creatividade, a hixiene, o esforzo e a igualdade.
Todas as actividades de Ponteverán son de balde e de inscrición libre.