A solidariedade é, desde a súa primeira edición, unha dos acenos de identidade do festival Surfing The Lérez, que convida ao público asistente a doar produtos de primeira necesidade que logo acaban na rede solidaria local RedeAxuda. Este 2024, ese espírito bateu récords e o seu impacto déixase ver nas ONGD locais. 

Na edición celebrada a pasada fin de semana, o público doou sete toneladas de produtos e unha parte deles acabaron nos andeis da despensa de Cáritas na rúa Joaquín Costa, desde onde unha vez ao mes reparten comida entre os seus usuarios. 

"Aquí sempre fai falta", explica María del Carmen Gallego, administradora de Cáritas Pontevedra, mentres mostra os andeis do almacén no que os alimentos comparten espazo co roupeiro da entidade. 

Tras a pasada fin de semana, chegoulles tal cantidade de comida que tiveron que pedir reforzos ao voluntariado para poder xestionala. Contaron cunha axuda extra de xente nova que botou unha man para poder facerse cargo dos alimentos. 

Pasta en diferentes modalidades, arroz, fabas, lentellas, aceite e todo tipo de alimentos empaquetados e non perecedoiros pasaron a encher os andeis que a semana anterior estaban case baleiras, xunto con latas de conserva e produtos de hixiene como cueiros e comida para bebés. 

Desde Cáritas móstranse moi agradecidos por todas as mostras de solidariedade, e por esta en particular, pero tamén apuntan a que o ideal é que a poboación chegue a estar concienciada de que esas doazóns se fagan en diñeiro que logo poida chegar aos usuarios en forma de vales de compra cos que ir ao supermercado. Sería unha medida positiva, sobre todo, para familias con fillos, para que poidan facer a compra con total normalidade, aínda que sempre con alimentos vetados como o alcol ou outro tipo de produtos non necesarios. 

No Surfing The Lérez, a Concellería de Servizos Sociais instalou unha mesa de recollida de produtos de primeira necesidade e a resposta foi, segundo a concelleira, Anabel Gulías, "espectacular". A cantidade foi tal que na xornada do sábado pola mañá xa tiveron que repartir 1.000 quilos de arroz, pasta e verduras ao Comedor de San Francisco porque non collían no almacén da Casa Azul. A partir do luns, comezou a repartición entre as entidades sociais da cidade, entre elas, Cáritas.