Coa música da Banda Xuvenil de Barro rematou este domingo a Festa do Viño de Barro, co espectáculo Verbena sinfónica.

Foi unha edición que recibiu milleiros de visitantes a pesar de estar marcada pola choiva.

A tradicional sardiñada do domingo repartiu arredor de 400 quilos de sardiñas antes do xantar popular, que bateu a súa marca de participación con case medio millar de comensais, e no que participaron representantes dos concellos de Meis, Portas, Meaño, Ribadumia e Cambados.

No XVII Certame da DO Rías Baixas da Festa do Viño de Barro o primeiro premio foi para a cooperativa Viña Moraima de Barro, co seu albariño Moraima, o segundo para Avó Roxo de Meaño e o terceiro para o Maccerato da adega Viña Almirante de Portas.

O alcalde, Xosé Manuel Fernández Abraldes, fai unha valoración "moi positiva" do resultado desta edición da Festa do Viño, destacando "o papel de todas as persoas e entidades que fixeron posible o éxito dunha festa que non para de crecer e que cada vez se consolida máis como unha das festas máis importantes da contorna".

Pantalla completa