Pontevedra terá tres (máis un) eurodeputados en Bruxelas os próximos cinco anos
Por Alejandro Espiño
A provincia de Pontevedra manterá no Parlamento Europeo unha presenza destacable. Os tres eurodeputados que optaban a revalidar o seu escano conseguírono.
Así, Francisco Millán Mon (PP), que ocupaba o oitavo posto na candidatura que os populares presentaban a estas eleccións, repetirá nunha Eurocámara á que chegou por primeira vez no ano 2004, hai xa vinte anos. Será, por tanto, a súa quinta lexislatura en Bruxelas.
O socialista Nicolás González Casares, pola súa banda, continuará no escano que logrou por primeira vez en 2019. Natural de Lalín, no seu caso era o número 11 da candidatura do PSOE.
Para Ana Miranda, orixinaria de Cuntis, será a súa cuarta etapa na Eurocámara, tras as súas experiencias previas en 2012-2013, 2018-2019 e desde 2022. Pero a representante do BNG farao, por primeira vez, con escano propio durante toda a lexislatura.
A todos eles sumarase un cuarto representante que, a pesar de non nacer en Galicia, presumiu das súas orixes pontevedresas durante toda a campaña electoral.
Trátase de Adrián Vázquez, que deu o salto ao PP desde Cidadáns e concorría no posto número 10 da candidatura popular. Aínda que nacido en Madrid, as súas raíces familiares están en Lalín e, para estes comicios europeos, fixo campaña co PP galego.
Relacionadas:
-
O PP gaña as eleccións europeas, o PSOE resiste e o BNG recupera o escano de seu
Por Alejandro Espiño |
-
Pontevedra vota (menos do agardado) nestas eleccións europeas
Por Alejandro Espiño |
-
Chamamento unánime a participar nunhas eleccións europeas nas que "nos xogamos moitísimo"
Por Alejandro Espiño |
-
Descanso con familia e amigos para os candidatos pontevedreses ás eleccións europeas
Por Alejandro Espiño |