Chamamento unánime a participar nunhas eleccións europeas nas que "nos xogamos moitísimo"
Por Alejandro Espiño
Como en calquera cita electoral que se prece, os principais actores políticos da nosa cidade fixeron un chamamento á participación dos cidadáns. Todos eles coincidiron en destacar a importancia destas eleccións europeas para o futuro do país.
O primeiro en exercer o dereito ao voto en Pontevedra foi o alcalde de Pontevedra, Miguel Anxo Fernández Lores, que votou ás nove e media da mañá en Marcón.
A candidata do BNG ao Parlamento Europeo, Ana Miranda, animou a ir votar nestas eleccións europeas "por Galicia, polas causas xustas da humanidade, polo antifascimo, pola paz e para que remate o xenocidio en Gaza".
Miranda votou no colexio electoral do Centro Social de Bouzas, en Vigo, onde acudiu sobre as dez da mañá coa súa filla, e asegurou que vota "con ilusión, con esperanza e con futuro" para que Galicia "volva a ter unha voz propia non Parlamento europeo".
En Pontevedra votou tamén o presidente da Xunta de Galicia, Alfonso Rueda. Fíxoo ao mediodía no Centro Galego de Tecnificación Deportiva acompañado, como é habitual, acompañado da súa muller e das súas dúas fillas.
Nesta ocasión, tamén lle arrouparon dous dos candidatos do PP ao Parlamento Europeo, Francisco Millán Mon e Adrián Vázquez; mentres que o portavoz popular en Pontevedra, Rafa Domínguez, acudiu a votar ao colexio electoral de Ponche Muíños.
Tras depositar o seu voto na urna, Rueda pediu un "pequeno esforzo" aos galegos para que "dediquen 10 ou 15 minutos" a votar nestes comicios que, segundo reiterou, "son moi importantes para Europa" e neles Galicia e España "xóganse moitísimo".
Pola súa banda, o candidato socialista ao Parlamento Europeo, Nicolás González Casares, depositou o seu voto en Lalín, onde destacou a importancia do voto para decidir "o futuro da Europa que queremos" e para reforzar o "proxecto máis grande na historia de paz e de democracia".
Relacionadas:
-
Pontevedra terá tres (máis un) eurodeputados en Bruxelas os próximos cinco anos
Por Alejandro Espiño |
-
O PP gaña as eleccións europeas, o PSOE resiste e o BNG recupera o escano de seu
Por Alejandro Espiño |
-
Pontevedra vota (menos do agardado) nestas eleccións europeas
Por Alejandro Espiño |
-
Descanso con familia e amigos para os candidatos pontevedreses ás eleccións europeas
Por Alejandro Espiño |