Pontevedra vota (menos do agardado) nestas eleccións europeas
Por Alejandro Espiño
A participación nas eleccións europeas que se disputan este domingo non está a ser tan alta como esperaban todos os partidos. Ás seis da tarde, hora na que se coñeceu o segundo avance, votaran apenas un 39,36% dos pontevedreses con dereito ao voto.
Son, en total, unhas 305.466 persoas as que votaron. É un 11,15% menos que nas eleccións europeas de 2019. Iso si, hai cinco anos estes comicios coincidiron coas eleccións municipais, o que sen dúbida animou a moitos máis electores.
A media de participación en Pontevedra é lixeiramente superior á que se rexistra no conxunto de Galicia, na que votaron ata media tarde 867.216 persoas, un 39,02% do censo total. É tamén un 11,18% menos que hai cinco anos.
As autoridades destacaron a normalidade e a ausencia de incidencias na constitución das 3.922 mesas electorais que acollen este domingo as eleccións ao Parlamento Europeo.
A última mesa en constituírse na provincia de Pontevedra foi en Ponteareas, sobre as 09:20 horas, debido á ausencia dos tres membros necesarios para constituíla. A primeira persoa que acudiu a votar viuse obrigado a quedar.
Ademais, en dous colexios de Vigo tamén se atrasou a apertura das mesas varios minutos ao faltar papeletas dalgúns dos partidos que concorren a estes comicios.
Nestas eleccións poden participar 2.702.442 galegos e galegas, dos que 109.690 farano por primeira vez nunhas eleccións europeas ao cumprir os 18 anos desde a última cita deste proceso.
No caso da provincia de Pontevedra, estaban chamados ás urnas con 915.122 cidadáns.
Relacionadas:
-
Pontevedra terá tres (máis un) eurodeputados en Bruxelas os próximos cinco anos
Por Alejandro Espiño |
-
O PP gaña as eleccións europeas, o PSOE resiste e o BNG recupera o escano de seu
Por Alejandro Espiño |
-
Chamamento unánime a participar nunhas eleccións europeas nas que "nos xogamos moitísimo"
Por Alejandro Espiño |
-
Descanso con familia e amigos para os candidatos pontevedreses ás eleccións europeas
Por Alejandro Espiño |