Crear unha contorna acolledora e confortable para os nenos que acoden ao Hospital do Salnés é o obxectivo das actuación levada a cabo na área sanitaria en colaboración coa Fundación Andrea.

As urxencias pediátricas do centro sanitario arousán incorporan decoración con mobiliario infantil e dous monitores televisivos: un fixo, emprazado na sala de espera, e outro televisor con soporte móbil para poder desprazalo tanto á área de camas de observación de Urxencias pediátricas coma nos boxes de asistencia.

Así mesmo, aportouse diverso material lúdico á sala de espera pediátrica para que poidan disfrutalo os meniños e as súas familias, amenizando e axudando a pasar unha mellor estadía. 

Esta intervención terá a súa continuidade en espazos de acceso á área de Urxencias e no andar de hospitalización pediátrica durante o vindeiro verán.

Tamén houbo outra intervención na sala de lactancia materna, equipándoa con mobiliario especificamente adaptado para potenciar o confort no proceso desta alimentación, que comeza tras o nacemento.