Denuncian un mozo por incordiar cun láser un helicóptero de rescate en Vilanova
Por Natalia Puga
Un veciño de Vilanova de Arousa de 29 anos enfróntase a unha denuncia por molestar ao piloto dun helicóptero de salvamento mentres estaba realizando tarefas de rescate na zona da ponte que une este municipio coa Illa de Arousa. A Garda Civil identificoulle por supuestamente apuntar ao vehículo cun puntero láser e os feitos están agora na vía xudicial.
Os feitos ocorreron sobre as 5.00 horas da madrugada deste mércores. Un cidadán alertou de que dúas persoas poderían terse tirado da ponte da Illa e mobilizouse ata o lugar o helicóptero Pesca I do servizo de gardacostas da Xunta de Galicia. Finalmente, constatouse que se tratou dunha falsa alarma, pero o vehículo realizou tarefas de procura e, mentres as facía, produciuse a acción do mozo de Vilanova que agora se reprocha.
Segundo fontes da Garda Civil, o Pesca I estaba sobrevoando a zona cando detectou que había unha persoa no espigón do porto de Vilanova de Arousa apuntando cun láser directamente á nave. Con esta acción, xerou serias molestias ao piloto, que viu dificultado o manexo do helicóptero.
Ante esta situación, desde o helícoptero pediuse apoio á Garda Civil e unha patrulla desprazouse ata o citado porto de Vilanova. Unha vez alí localizaron un mozo paseando polo espigón e déronlle o alto para preguntarlle polo citado puntero láser.
Nun primeiro momento, o mozo negou que usase o puntero, pero os axentes realizáronlle un cacheo superficial e atopáronlle o dispositivo escondido na manga da chaqueta. Constatada a situación, procederon a imputar a G.S.M. e puxeron os feitos en coñecemento do Xulgado de Garda de Vilagarcia de Arousa.
Fontes consultadas sinalaron que a denuncia realízase conforme á Lei 209/1964, de 24 de decembro, pola que establece a Lei penal e procesal en materia de navegación aérea. Esta norma cualifica como falta contra a policía e a seguridade da navegación aérea a acción daquelas persoas que acendan luces, lumes, emitan sinais radioeléctricas ou de calquera outra clase que poidan inducir a erro na navegación aérea, si diso non se deriva ningún dano.
En relación coa intervención de rescate, o Centro de Atención ás Emerxencias 112 indicou que foi un particular ao redor das 2.30 horas da madrugada quen alertou ao CAE 112 Galicia do suceso. Passaron aviso a Salvamento Marítimo, que mobilizou un helicóptero e unha embarcación. Por terra colaboraron no operativo a Garda Civil, efectivos de Protección Civil de Cambados, Vilanova e Vilagarcía de Arousa, ademais dunha ambulancia. Despois de varias horas de busca con resultado negativo, os medios retiráronse do lugar por falta de visibilidade e credibilidade da información facilitada polo alertante.