SOS Sanidade pública quenta motores de cara á manifestación do 14-F
Por Oskar Viéitez
A Plataforma contra a privatización e polo Hospital ÿnico de Pontevedra (SOS Sanidade Pública), quenta motores de cara á gran manifestación cidadá convocada para o venres 14 de febreiro.
Ao longo destes días os responsables deste colectivo realizarán diversos actos informativos para "concienciar á cidadanía do importante que é a mobilización", sinalou Francisco Vázquez Vizoso, voceiro da Plataforma.
O acto máis destacado terá lugar este luns 10 de febreiro, ás 20:00 horas, no Teatro Principal, e consistirá nun foro aberto sobre a actual situación sanitaria no que destacados axentes sociais expoñerán o seu punto de vista e tratarán de respostar a todas aquelas cuestións que pregunte o público.
Vázquez Vizoso, que compareceu este venres acompañado de numerosos integrantes da Plataforma, recordou que a manifestación se convoca "contra a marxinación sanitaria de Pontevedra e O Salnés".
"Non queremos ter en Santiago o hospital de referencia. Ao estar máis lonxe, supón un risco para certas patoloxías, maior incomodidade e custo adicional para pacientes e familiares", sinalou.
Outros motivos polos que se organiza esta mobilización pasan polo rexeitamento ao copagamento dos fármacos dispensados nas farmacias dos hospitais aos pacientes ambulatorios e, máis en xeral, contra os recortes e a privatización da sanidade pública.
Igualmente esta Plataforma reivindica a razón que lle fixo nacer, a dotación dun "Hospital ÿnico e Público en Pontevedra, con todos os servizos que necesitamos e nos corresponden".
A manifestación do próximo venres partirá da praza da Ferrería ás 20:00 horas para dirixirse cara ao Hospital provincial e rematar na Praza de España.