Na terceira das Conversas na Ferrería dedicadas ao ámbito taurino, os afeccionados que se deron cita en PontevedraViva Radio manifestaban os seus pareceres sobre o que foi a Feira da Peregrina.
Contamos coas valoracións de Pepé Maquieira, xestor de Taurophilos, Alejandro Pedras da peña David Campos; Raúl Martínez da peña Miuras, Román Habela da peña Gin- Kas e Juan Riveiro, presidente da Coordinadora de Peñas Taurinas de Pontevedra. Preguntados sobre cal foi o mestre que mellor faena realizou na Feira de 2018 en Pontevedra e o mellor encierro resólvese case con unanimidade: a gandería de 'Virgen María' que foi a seleccionada para o toureo a pé no festexo do sábado 11 para Fandi e Ferrera; e en canto a toureiros Talavante, resulta igualmente case unánime, como mellor do abono, sen pasar por alto e mencionar no nivel do anterior as faenas de Morante de la Puebla.
CAYETANO RIVERA, DOS COSTILLAS ROTAS
En referencia a esta recentemente concluída Feira Taurina, apuntar que esta semana en curso Cayetano Rivera viuse obrigado a suspender os dous compromisos que tiña adquiridos. Como sinalaba na súa conta de twitter: "sinto comunicarvos que teño que cancelar as corridas en San Sebastián e Xixón polo contratempo sufrido en Pontevedra, fractura de dúas costelas. Espero recuperarme pronto para estar canto antes de novo nos ruedos". Segundo o parte médico do Servizo de Urxencias do Hospital de Donostia sinalábanse "fracturas costais de 8ª e10ª costelas dereitas" e recoméndase "repouso relativo, evitar esforzos nas próximas 4-5 semanas".