Pontevedra Viva - Pontevedra

Lydia Pérez perde o combate polo bronce nos Xogos Mediterráneos

Alejandro — Wed, 27 Jun 2018 19:54:31 +0200

Non puido ser. A pontevedresa Lydia Pérez Touriño quedou ás portas da medalla de bronce nos Xogos Mediterráneos.

A deportista do Club de Loita Pontevedra caeu contra a italiana Sara da Col na loita polo terceiro posto da categoría de 62 quilogramos. Fíxoo por un axustado 5-4.

O camiño de Lydia Pérez cara á loita polas medallas non foi fácil. Perdeu o seu primeiro combate ante a turca Elif Yesilirmak por 5-0.

Con todo, a pontevedresa repúxose e, no seu segundo duelo, pasou por encima da francesa Sonia Baudin, á que derrotou por 11-0.

A remontada truncábase, con todo, coa derrota en semifinais ante a tunisiana Marwa Amri. A galega caía por 4-0.

A Deputación lidera o ránking estatal de pago a proveedores

Redacción — Wed, 27 Jun 2018 19:35:34 +0200

A Deputación de Pontevedra sacou peito da súa xestión este mércores e, citando un informe da Federación Nacional de Asociaciones de Traballadores Autónomos (ATA), destacou que é a administración provincial de toda España que antes abona as súas facturas.

Segundo a información facilitada pola Deputación, liderou o ranking do pago a proveedores no primeiro semestre deste ano 2018, cun tempo medio de pago de 17 días.

A Deputación sitúase por diante das deputacións da Coruña ou Palencia que, cun periodo de 20 días, se sitúan en segundo lugar. Ten, ademais, cifras máis positivas que as da Xunta de Galicia, que paga a 33 días.

Tras coñecer o informe de ATA, a presidenta provincial, Carmela Silva, expresou a súa satisfacción polos datos: "estamos a traballar arreo para que as boas prácticas sigan a ser a nosa sinal de identidade".

A Xunta pon no tellado do Concello de Pontevedra fixar unha reunión para falar da comarcalización dos bombeiros

Redacción — Wed, 27 Jun 2018 19:06:15 +0200

A Xunta de Galicia reaccionou este mércores á comparecencia da presidenta e o vicepresidente da Deputación, Carmela Silva e César Mosquera, para presentar o estudo sobre a xestión das emerxencias realizado polo organismo provincial. Nunha nota de prensa remitida aos medios de comunicación horas despois, puxeron no tellado deles e tamén do Concello de Pontevedra os novos pasos a dar para fixar o novo mapa de emerxencias.

Así, recordáronlles que o proceso de comarcalización dos parques de bombeiros das grandes cidades do resto de Galicia xa está avanzando e tan só na provincia de Pontevedra están atopando atrancos.

Eses obstáculos, segundo insisten, levaron ao presidente da Federación Galega de Municipios e Provincias (Fegamp), Alfredo García, a buscar unha maneira de desbloquear a situación e optouse por facer un cambio con respecto aos pasos dados en Ourense, Lugo e A Coruña. A Xunta aceptou presentarlle primeiro o proxecto aos concellos de Pontevedra e Vigo e despois facelo coa Deputación.

Deste xeito, a pasada semana enviaron un escrito ao Concello de Pontevedra solicitando a fixación dunha data para a entrevista, sen que ata o de agora se obtivera unha resposta. A elección da data depende da administración municipal.

No que vai de ano, alcanzáronse acordos coas deputacións de Ourense, Lugo e A Coruña e cos concellos de Ferrol, Santiago de Compostela e Ourense, gobernados por forzas políticas de distinto signo.

A Xunta insiste en que comarcalización dos parques das cidades e a creación de novos servizos nas zonas de sombra, previstas pola Xunta de Galicia e abordadas no Grupo de Traballo polas emerxencias, permitirán que, cando se produza unha incidencia, se estenda o tempo de resposta de 20 minutos dun 65 a un 90% do territorio e dun 87 a un 95% da poboación de Galicia.

No caso de Pontevedra, por exemplo, permitiría que o parque da capital provincial puidese dar servizo aos concellos máis próximos, que agora son atendidos por parques máis alonxados. A maiores, no interior da provincia, está prevista a creación de tres novos servizos que eliminarían as zonas de sombra restantes.

A folla de ruta pasa por que, unha vez mantidas as reunións con Pontevedra e Vigo, se aborde o proxecto coa Deputación de Pontevedra. Ao respecto, a Xunta insiste en que as institucións provinciais son as competentes en materia de emerxencias para concellos de menos de 20.000 habitantes e a súa participación económica é imprescindible para desenvolver as comarcalizacións.

Poio e Pontevedra, listas para o campionato de España infantil feminino de fútbol sala

Redacción — Wed, 27 Jun 2018 19:02:32 +0200

Pontevedra e Poio acollerán, a partir deste xoves 28 de xullo, o campionato de España infantil feminino de fútbol sala. Preto de 80 novas promesas deste deporte competirán para converterse no mellor equipo de España.

O torneo, organizado polo Poio Pescamar e o Concello de Poio, disputarase nos pavillóns municipais de ambas as localidades. A entrada a todos os partidos será gratuíta.

Na súa primeira fase, o grupo para estará formado polo equipo anfitrión, o CFS Feminino San Fernando, o CD Ciudad de Nara e o Palau Solitá Plegamans 2007. Xogarán os seus partidos na Seca.

Pola súa banda, o Pavillón Municipal de Pontevedra será a sede do grupo B, que enfrontará ao CD Vila de Benamejí, o CD Cantera, o Futsal Alcantarilla e o Rede Star's.

A competición arranca este xoves, ás 17.00 horas, co partido entre o CD Vila de Benamejí e o CD Cantera en Pontevedra. O Poio, pola súa banda, debutará na Seca ás 20.00 horas ante o Ciudad de Nara.

Todos os emparellamentos pódense consultar nesta ligazón.

Os campións de cada grupo enfrontaranse na final do torneo, que se disputará o sábado no pavillón da Seca.

A fiscal rebaixa de 28 a 15 anos a petición de prisión para os autores confesos do crime da anciá de Lérez

Mónica, Anxo — Wed, 27 Jun 2018 18:32:01 +0200

A fiscal Marta Durántez decidiu modificar a petición dun delito de asasinato por un de homicidio coa agravante de disfrace e abuso de autoridade nas conclusións finais da vista oral que se desenvolve na Audiencia de Pontevedra contra os dous acusados, Constante Sánchez e José Manuel González. Ambos se confesaron autores, na primeira sesión do xuízo, de propinar unha malleira en xullo de 2016 a Pilar Fernández, unha muller de 87 anos que residía en Lérez, para que lles indicase onde gardaba o diñeiro. A muller falecía semanas máis tarde como consecuencia dos golpes recibidos.

Precisamente, na sesión deste mércores, lria do Río, subdirectora territorial do Imelga (Instituto de Medicina Legal de Galicia) de Pontevedra confirmaba a preguntas da fiscal que Pilar Fernández falecera como consecuencia desas lesións causadas pola brutal agresión dos dous autores confesos. Indicou que os golpes provocaron diversos danos internos en abdome e tórax da muller ata o punto de que se non se operou o bazo de maneira urxente como se fixo, o shock fose máis inmediato e mesmo, de non chegar as asistencias sanitarias, morrese no seu propio domicilio tras o asalto. Ademais indicou que a vítima polo seu historial médico era totalmente autónoma e só sufría acháquelos "propios da idade", polo que chegou a admitir que os golpes poderían causar o mesmo resultado de morte nunha persoa máis nova, debido a que estas agresións afectaron á arteria pulmonar que desencadeou unha pequena hemorraxia interna, sen que os médicos do Hospital Montecelo que a atenderon puidesen detectar de onde procedía o sangue afectándolle á zona dos pulmóns. A forense explicou con detalle ao xurado popular, utilizando as fotografías que se mostraban nunha pantalla, como se produciron as feridas derivadas da intensidade dos golpes recibidos. "No es accidental, sino homicida", sinalou ao explicar a causa da morte.

Pola súa banda a forense Marta Medrano fixo un relato detallado do historial de adicción ás drogas de ambos os acusados aos que cualificou como "toxicómanos de longa duración" consumidores de cocaína e opiáceos. Cando foron detidos en setembro de 2016, a análise do cabelo mostraba o consumo destas substancias durante os últimos meses.

A fiscal indicou ao xurado que reducira a pena no mínimo posible. Inicialmente, antes da vista oral, solicitaba 28 anos de prisión por delitos de roubo con forza nas cousas, roubo de uso de vehículo, roubo con violencia, asasinato e furto. Tras a declaración dos acusados, a representante da Fiscalía modificou ademais da petición de asasinato, a substitución de roubo con forza por un delito de furto, que non carrexa pena de prisión. Marta Durántez xustifica este cambio porque, durante a vista, non se puido acreditar que forzasen portas ou xanelas para entrar na vivenda da vítima. En relación co roubo con violencia entende que os agresores utilizaron uns panos para non ser recoñecidos e eran máis fortes fisicamente e maior número que a vítima, polo que aplica as agravantes de disfrace e abuso de superioridade. Desta forma, a petición de penas de prisión por parte da Fiscalía rebáixase a 15 anos, atendendo á confesión da autoría e á adicción ás drogas dos procesados.

As dúas avogadas da defensa aceptaron a modificación da petición de penas do Ministerio Fiscal, que tamén substitúe as multas económicas por traballos en beneficio da comunidade, xa que ambos os imputados decláranse insolventes. Os dous falaron, cando a xuíza deulles oportunidade para facelo na sala durante esta xornada, volvendo mostrarse moi arrepentidos. José Manuel González pediu perdón á familia mentres que Constante Sánchez foi máis contundente: "si no fuera por la mierda de la droga no estariamos aquí", afirmou ante o tribunal.

Este xoves 28, o xurado popular deberá deliberar para responder as preguntas que lle presente a xuíza da sección cuarta da Audiencia antes de facer público o seu veredicto.

Ana Isabel Vázquez e Lupe Murillo súmanse ao equipo de Rafa Domínguez

Redacción — Wed, 27 Jun 2018 18:07:18 +0200

Rafa Domínguez segue a completar a executiva que o acompañará á fronte do PP de Pontevedra, a partir do congreso local que se celebrará este sábado. Os dous últimos nomes en confirmarse son os de Ana Isabel Vázquez e Lupe Murillo.

Ambas son, destaca Domínguez, dúas mulleres que contan cunha ampla experiencia na administración pública e no mundo empresarial.

"Coñecen os problemas e as inquedanzas do noso municipio e dos seus veciños e a súa presenza permitirá darlle un impulso ao partido", engadiu.

Ana Isabel Vázquez é licenciada en Filoloxía Inglesa e impartía clases na UNED. Foi ademais concelleira do PP en Pontevedra e deputada provincial. Na actualidade é xerente da Fundación Cidade da Cultura.

Lupe Murillo, licenciada en Dereito, compatibiliza a dirección xeral de Pescamar coa súa labor como deputada autonómica no Parlamento de Galicia e como presidenta do Pontevedra C.F.

"Estou a conformar un equipo potente, con persoas que aporten ilusión e teñan ganas de traballar por e para Pontevedra", sinalou o candidato popular.

Un estudo da Deputación constata que as emerxencias están peor cubertas no interior da provincia e propón como mellorar

Natalia — Wed, 27 Jun 2018 17:52:04 +0200

O modelo actual de xestión das emerxencias de Pontevedra deixa zonas de sombra nas que non se presta a correcta atención en caso de incidencias e provoca que 52.540 habitantes non teñan condicións de cobertura óptimas. Eses lugares están ubicados fundamentalmente en municipios do interior e, en menor medida, no sur, sendo as zonas de costa as que reciben mellor cobertura a pesar de ser as máis poboadas.

Estas son algunhas das moitas conclusións dun estudo realizado por expertos independentes para a Deputación de Pontevedra sobre a situación actual das emerxencias e as formas de mellorala. A presidenta e o vicepresidente provinciais, Carmela Silva e César Mosquera, destacan que supón un documento que senta as bases para sentarse a negociar coa Xunta de Galicia e fixar un novo modelo de emerxencias.

Silva destacou que se trata dun informe "serio e rigoroso" que era moi necesario facer antes de poñerse a definir o novo mapa de emerxencias, pois "calquera modelo debe estar baseado en análises rigurosos da realidade". "Xa que a Xunta non plantexaba ese modelo desde un análise serio", sostén, optaron por encargalo eles.

O goberno bipartito PSOE-BNG presentará ese informe ao resto dos grupos políticos con representación na Corporación provincial o vindeiro martes 3 de xullo e este mércores deron a coñecer os datos básicos do mesmo ao tempo que explicaban que inclúe unha análise comparativa de alternativas ao actual modelo de prestación de servizo de emerxencias da provincia.

As alternativas plantexadas pola Deputación neste informe, e sobre as que propoñen sentarse a negociar coa Xunta para sacar adiante un novo modelo, inclúen a creación de tres novos parques de bomberos nas zonas de Condado-Paradanta, Cerdedo-Cotobade -para dar servizo a Terra de Montes e Tabeirós- e na comarca de Pontevedra nalgún punto entre Pontevedra e A Lama. Propón tamén cambiar de ubicación un dos dous parques actuais da comarca do Salnés.

Carmela Silva explicou que esas propostas non eran o obxectivo do estudo, senón facer unha diagnose da situación e das posibilidades de mellora. Neste sentido, indican que a súa proposta de mellora reduciría nun 64,5% a poboación sen cobertura óptima, ao pasar eses 52.540 habitantes actuais en zonas de sombra a 18.650. O modelo de comarcalización da Xunta de Galicia deixaría en condicións non óptimas de cobertura a 25.823 persoas.

A presidenta provincial destacou que o informe sitúa no mapa os lugares con máis riscos de distinto tipo de incidencias, desde os incendios urbanos aos forestais, pasando por accidentes de tráfico e outro tipo de siniestros. Segundo esa análise, o interior da provincia necesita unha atención que non lle dá o proxecto de comarcalización que formula a Xunta de Galicia. Isto demostra, ao seu xuízo, que a proposta da administración autonómica non parte de estudos claros, ademais de non fixar recursos para destinar aos servizos de emerxencias, xa sexa humanos como técnicos e económicos.

O informe recolle tamén unha comparativa dos modelos atendendo á efectividade coa que se cobre en mellores condicións o territorio. A proposta feita, coa creación de tres novos parques, melloraría un 17% o modelo actual e aínda recolle a posibilidade de mellorar máis no caso de optar por un cambio de ubicación dun dos dous parques do Salnés, pois están en Vilagarcia e Ribadumia, na mesma área. En caso de cambiar un deles, a mellora podería chegar ao 25,8%

Mosquera, pola súa parte, aproveitou a presentación do estudo para insistir en que tanto os bombeiros do parque municipal de Pontevedra como os de Vigo "cando hai unha emerxencia de verdade xa están comarcalizados na práctica" e desprázanse alá onde sexa necesario. O problema é que "non os chaman" e atribúe esa situación ao 112.

Os piragüistas pontevedreses, a polo Europeo junior e sub23 de Italia

Redacción — Wed, 27 Jun 2018 17:12:12 +0200

Preto de 700 atletas de 33 países participarán a partir deste xoves no campionato de Europa junior e sub23 de piragüismo, que se disputará no lago Santa Caterina da localidade italiana de Auronzo di Cadore.

Entre eles, haberá unha ampla representación de padeeiros galegos. Serán 16, un de cada tres dos deportistas que defenderán as cores da selección española. E, como non, os pontevedreses serán maioría.

Na categoría junior competirá Manuel Fontán (Náutico O Muíño) nas probas de C1 200 e C1 1.000 metros. Pola súa banda, María de la Peña (EP Ciudad de Pontevedra) estará en C1 200 e en C2 500 xunto a María Pérez (Náutico O Muiño), que correrá tamén o C1 500; e Raquel Torres (Piragüismo Verducido) participará no K1 500 e formará parte do K4 500.

Entre os sub23 destaca a participación de Noel Domínguez (Breogán do Grove) no C2 500 e o C2 1.000 metros xunto a Gonzalo Martín en ambos os casos, Luís Rodríguez (Piragüismo Portonovo), que formará parte do K4 500; e Iago Monteagudo (Club Naval Pontevedra), que ademais de integrar o K4 500, estará no K2 1.000 metros con Martín Montero.

Carla Sieiro (Piragüismo Poio), pola súa banda, será a representante pontevedresa nas probas de C2 200 e C2 500 metros, xunto a Raquel da Costa (Club As Torres de Catoira).

O programa previsto para o xoves conta coas eliminatorias de 1.000 e 500 metros. O venres seguirá coas semifinais de 1000 e 500 metros e as eliminatorias de 200.

As primeiras medallas outorgaranse o sábado cando se leven a cabo as finais en 1000 metros. O sábado tamén se correrán as semifinais de 200 metros. Por último, o domingo os campionatos concluirán coas finais de 500 e 200 metros.

Serviocio ou Civis Global, unha das dúas xestionará as piscinas de Campolongo

Alejandro — Wed, 27 Jun 2018 15:14:05 +0200

A reforma e posterior xestión do complexo deportivo de Campolongo decidirase entre dúas empresas. Trátase de Serviocio -actual adxudicataria- e Civis Global, compañía que opera baixo a marca Máis que auga. A mesa de contratación excluíu as outras catro ofertas por incumprir os criterios técnicos recollidos no prego do concurso.

Serviocio parte, a priori, cunha pequena vantaxe. Obtivo 29,33 puntos na valoración técnica, que inclúe o anteproxecto de obra para a reforma e o proxecto de xestión e explotación das instalacións, fronte aos 27,91 puntos de Civis Global.

Os proxectos presentados, segundo explicou Raimundo González, foron examinados "na súa gran maioría" polos técnicos municipais, coa asistencia da empresa Lagares Oca unicamente na parte relativa á execución das obras.

Agora, deberase examinar a oferta económica presentada por ambas as empresas para comprobar se algunha delas incorre en baixa temeraria.

Serviocio propón investir 4,6 millóns de euros na reforma das instalacións deportivas, unha oferta que supón que o Concello -que estaba disposto a achegar un millón- non teña que asumir custo algún. Ademais, propón unha redución das tarifas dun 2,5%, que sexa gratis para usuarios dos servizos sociais e pagar un canon anual de 60.000 euros.

Pola súa banda, Civis Global reduce o investimento a 4,1 millóns de euros e tampouco recorre ao millón proposto polo Concello. Propón unha rebaixa das tarifas actuais nun 1,5% e unha bonificación do 70% aos usuarios que remitan os servizos sociais municipais. O canon para pagar, pola súa banda, sería de 25.000 euros.

Raimundo González explicou que "sexa cal sexa" a empresa que se faga coa xestión das piscinas de Campolongo durante os próximos 20 anos, producirase unha "transformación profunda" das instalacións que serán "practicamente novas", ao estar prevista un investimento "súper potente" por parte das dúas licitantes.

A mesa de contratación excluíu as ofertas presentadas por Dos Deporte Ocio Salud Ibérica e Ferrovial Servicios por superar os seis meses fixados para a execución das obras de reforma. Carpa Servicios y Conservación, pola súa banda, foi por non respectar os pregos técnicos en materia de sustentabilidade ambiental; e Supera por non alcanzar o mínimo de 22,5 puntos na valoración do proxecto.

A Feira Taurina da Peregrina comezará o 5 de agosto oa nova Lei de Espectáculos de Galicia en vigor

Marisa — Wed, 27 Jun 2018 14:30:00 +0200

A Feira Taurina da Peregrina mantén os tres festexos para o próximo agosto; catro se se ten en conta o espectáculo previsto o día 15. Como vén sendo habitual nos carteis deseñados para a cidade de Pontevedra, no coso de San Roque farán o paseíllo máximas figuras do escalafón, como é o caso do destro sevillano Morante de la Puebla, que formará parte da terna prevista para o domingo 12 de agosto.

A feira comezará o domingo 5 de agosto e terá continuidade a seguinte fin de semana: sábado 11 e domingo 12. Completarase o 15 de agosto, véspera de festivo nacional, cun espectáculo ecuestre pensado para o público infantil e familiar. Será a próxima semana cando a empresa dea a coñecer os carteis destes festexos.

Dada a entrada en vigor este próximo 2 de xullo da nova Lei de Espectáculos de Galicia que sinala no seu articulado que "queda prohibido o acceso aos espectáculos taurinos en recintos pechados ás persoas menores de 12 anos" estes non poderán asistir ás tres primeiras corridas de touros.

Non obstante tendo en conta o carácter do evento previsto para o día 15, este sería o único ao que poderían acudir.

CONCURSO DE CARTEIS

Pola súa banda, a Coordinadora de Peñas Taurinas de Pontevedra, deu a coñecer o fallo do cuarto concurso de carteis para a feira. Nesta ocasión o cartel gañador leva por título 'Arena'. Mostra as figuras dun touro e un toureiro cun par de banderillas, a base de pequenas pedras sobre un fondo de area de praia. Un deseño orixinal, que difire das seleccións gañadoras en anos anteriores.

O traballo corresponde a un pontevedrés, Daniel Moldes Vidal e por tanto gañador do premio de 500 euros co que está dotado este concurso.

Os 40 anos de loita LGTBI fanse visibles no Pazo Provincial

Mónica, Redacción — Wed, 27 Jun 2018 14:09:19 +0200

O Pazo Provincial da avenida Montero Ríos escenificará ata o vindeiro domingo 1 de xullo o apoio da Deputación de Pontevedra á loita do colectivo LGTBI contra a discriminación e en favor da igualdade de todas as persoas. Desde este xoves loce no balcón principal unha bandeira arcoiris símbolo do movemento.

A presidenta e o vicepresidente do organismo, Carmela Silva e César Mosquera, e catro deputados colocaron a bandeira para conmemorar o Día Internacional do Orgullo LGBTI, que se celebra cada 28 de xuño, e que, para a Deputación Provincial, é a xornada na que "a sociedade se pon de lado das persoas e defende ao colectivo LGTBI".

"Cada día temos unha sociedade máis aberta, máis comprometida, máis igualitaria, pero aínda queda moito por avanzar", reivindicou Carmela Silva, que lembrou que tanto a nivel estatal como autonómico as estatísticas revelan que a "aplastante maioría" dos delitos de odio cométense contra persoas LGTBI.

Á vista desas estatísticas, sostén que hai que seguir demandando, denunciando e reivindicando e "poñéndose ao lado de todas as persoas", de aí a importancia de conmemorar este tipo de días.

Ademais, a loita LGTBI cumpre este ano 40 anos de loita en España, contabilizando desde a primeira manifestación do Orgullo LGTBI en España.

Un concello leonés retira unha campaña que vinculaba as Rías Baixas coa "costa da Fariña"

Alejandro — Wed, 27 Jun 2018 13:52:49 +0200

"Rías Baixas. Costa da Fariña". É o lema empregado polo concello leonés de Camponaraya para promocionar unha viaxe a Pontevedra. Unha denuncia do goberno provincial, que consideraba que se xeraba unha imaxe "inxusta e pouco apropiada" da provincia, provocou a retirada da publicidade asociada a esta campaña.

Tras as conversas mantidas entre o equipo municipal e o provincial, o concello leonés confirmou este mércores que xa están retirados todos os carteis promocionais da campaña.

No itinerario da viaxe, que terá lugar a comezos de xullo, Camponaraya levará aos seus veciños a un percorrido por Cambados, Combarro, A Barosa e o Pazo de Rubiáns.

Segundo indicaron desde o goberno do municipio do Bierzo, a xestión da viaxe corre a cargo dunha empresa que, "desacertadamente", empregou o lema "Rías Baixas. Costa da Fariña" para a súa promoción.

Deste xeito, Camponaraya insistiu en reiterar que na súa páxina web anunciaron a viaxe a Galicia e que o lema, escollido por unha empresa, "non é axeitado" para dar a coñecer esta zona á que acoden desde hai anos.

Para a Deputación de Pontevedra entenden que este lema, elixido polo éxito da serie de televisión, podía vencellar a marca Rías Baixas, que promove a institución provincial a nivel nacional e internacional, "coa tristemente época pasada do narcotráfico na comarca do Salnés".

O asunto xa fora advertido polo deputado popular Luís Aragunde, que se mostrou indignado por esta publicidade ao entender que provoca que o "estigma" das drogas "volva calar" entre a xente. Por iso, espera que a Deputación, á que felicita pola súa xestión, estea "máis atenta" a temas que poden causar "moito dano" á imaxe das Rías Baixas.

A reforma de Cruz Vermella comezará coa construción da nova praza peonil

Alejandro — Wed, 27 Jun 2018 13:34:59 +0200

As obras de reforma da rúa Cruz Vermella comezarán a próxima semana. Así o anunciou o concelleiro Demetrio Gómez. A falta dos últimos trámites administrativos, o goberno municipal calcula que será "a golpe de mércores".

Os operarios da empresa Covsa, compañía que executará estes traballos, terán como primeiro labor a creación da nova praza peonil que estará entre as instalacións da Cruz Vermella e o colexio Manuel Vidal Portela.

A intención é que este novo espazo estea "practicamente rematado" en setembro, para que a comunidade educativa do centro poida acceder ás aulas "con total normalidade" e gozando desta nova área peonil.

Demetrio Gómez avanzou que, ademais, antes de que comece a intensa actividade festiva e deportiva do verán terase que cortar ao tráfico a rúa Pai Gaite para retirar os grandes plátanos "con completa seguridade".

O operativo, que estará coordinado coa Policía Local, está pensado para facilitar un traballo que é "complexo", dando que hai que "actuar moi ben" para que as ramas que pasan por encima do pavillón non danen as instalacións ao ser retiradas.

Desde o goberno municipal lembran que esta reforma integral, que inclúe tamén outras rúas da contorna como Salustiano Portela Pazos, Álvaro Cunqueiro e a Praza da Castaña, ten un prazo de execución de dez meses.

Ante calquera problema que poida xurdir, avanzou Demetrio Gómez, "estaremos cos veciños", cos que terán xa unha primeira reunión a partir do próximo luns día 9 de xullo para comprobar como avanzan os traballos nos seus primeiros días.

Un problema burocrático deixa a algúns policías nacionais sen cobrar un complemento

Oskar — Wed, 27 Jun 2018 13:22:26 +0200

O sindicato Unión Federal de Policía (UFP) denuncia que ao redor duns 80 policías nacionais que prestan servizo nos Xulgados de Galicia levan desde o mes de febreiro sen cobrar un complemento que paga a Xunta de Galicia de algo máis de 400 euros.

Desde a UFP indicaron, o problema non é da Xunta que se librou o diñeiro senón da Dirección Xeral da Policía que segundo denuncian escúsase dicindo que Facenda non lle permite enviar o diñeiro que lle abonou a Xunta porque o concepto no cal se lle abona aos funcionarios, que é o de segunda actividade con destino, xa non existe.

"Ante esta eventualidade burocrática as grandes mentes pensantes da Dirección quedáronse bloqueadas", critican os representantes da UFP.

Con todo, os gardas civís que realizan o mesmo servizo o cobran con normalidade debido a que eles teñen ben conceptuada esa situación no que chaman reserva activa. Ademais os gardas civís cobran 100 euros máis que os policías nacionais nese servizo, e non realizan festivos e fins de semana que fan os policías.

Ante esta situación que non se acaba de solucionar o malestar por parte dos Policías é maiúsculo e sopesan solicitar a baixa deste servizo se non se soluciona dunha vez.

Afundación acolle o Don Quijote do Ballet de Moscova en Pontevedra

Redacción — Wed, 27 Jun 2018 12:52:07 +0200

A representación do Ballet de Moscova de Don Quijote sairá á escena o venres 6 de xullo, ás 21.00 horas, na Sede Afundación de Pontevedra.

O Ballet de Moscova presenta unha das obras emblemáticas da historia da danza teatral, Don Quijote, ballet en tres actos baseado no capítulo XIX do segundo libro de El ingenioso hidalgo Don Quijote de la Mancha.

O argumento céntrase principalmente nos amores de Kitri e o barbeiro Basilio e nas aventuras dos míticos personaxes Don Quijote e Sancho Panza ao redor da nova parella.

A música foi composta por Ludwig Minkus e a súa estrea mundial tivo lugar no ano 1869 no Teatro Bolshoi de Moscova a petición dos Teatros Imperiais de Rusia.