Tribuna Viva
Denunciamos a agresión homófoba de Vilagarcía de Arousa
Tralo coñecemento de que na tarde deste domingo se produciu unha agresión de carácter homófobo na cidade da Vilagarcía de Arousa. Un grupo de mozos agrediron a outro, polo mero feito de ser gai. Ademais de escoitar insultos, este rapaz tamén recibiu unha malleira.
Dende a Asemblea LGTBI de Galiza Nova da comarca do Salnés queremos mostrar a nosa máis enérxica repulsa por este acto e tamén mostrar a nosa solidariedade co mozo agredido.
Nunha sociedade dominada polo heteropatriarcado, a violencia LGTBIfóbica aínda goza de certa impunidade, chegando a ser o delito de odio máis frecuente no Estado español.
O feito de ser trans, gai ou ser muller mantennos nunha tensión continua en situacións tan correntes coma camiñar tranquilamente pola rúa. A ausencia dunha lexislación que identifique estes tipos de violencia e impoña sancións específicas, fai que a situación se agrave e que a inmensa maioría destes delitos queden impunes ou mesmo sen denunciar, xa que a vítima en moitos casos vese totalmente desamparada ante a lei.
Dende Galiza Nova unha vez máis condenamos enerxicamente a LGTBifobia e a súa violencia, e por extensión opoñémonos a todas as formas de violencia mediante as cales o sistema heteropatriarcal nos oprime. Por iso reiteramos a nosa implicación e fondo compromiso coa loita polos dereitos de identidade de xénero e de
liberdades sexuais.