Debut, a cita anual co alumnado do Máster Universitario en Deseño e Dirección Creativa en Moda, a antiga Esdemga, regresa á normalidade pre pandemia. Xa en 2021 recuperou o seu formato presencial cun desfile con limitacións e este 2022 realizarase xa sen restricións, cun desfile de moda ao uso aberto a toda a cidadanía e disposto a recibir no recinto feiral de Pontevedra a máis dun milleiro de persoas.
Mil cadeiras esperan aos espectadores, pero en Debut "todo o mundo é benvido", destaca a coordinadora do máster, Lola Dopico, que estaría encantada de ver todo o recinto cheo de público nesas cadeiras e tamén de pé gozando desta cita coa moda.
"O traballo é monumental e hai que celebralo e hai que poñelo en valor", destacou este xoves durante a presentación desta edición 2022 de Debut. Acompañárona a concelleira de cultura, Carmen Fouces; e Luís Torres, director de área adxunta á Vicerrectoría do campus de Pontevedra da Universidade de Vigo.
Debut chega este ano á maioría de idade e tanto Fouces como Dopico destacaron a súa importancia como unha cita que "facilita a apertura de portas da Universidade cara á sociedade", dando a coñecer o traballo dun máster que, segundo o seu responsable, é xa "un referente a nivel nacional e internacional de formación pública en moda", todo un 'rara avis' nesta especialidade.
Tal e como destacou Luís Torres, Debut é un desfile de moda, pero "é moito máis que iso" e inclúe unha serie de actividades paralelas que axudan a achegar máis coñecementos ao alumnado e, ademais, a conectalos co mundo profesional.
O próximo 18 de novembro ás 20.00 horas celebrarase o desfile no Pazo da Cultura cos traballos de fin de máster de 12 estudantes que terminaron a formación e, ademais, mostrarán os seus proxectos de fin de curso 18 estudantes de primeiro curso.
As actividades paralelas comezarán o luns 14 de novembro e incluirán durante toda a semana 4 'workshops', dúas mesas redondas e unhas xornadas técnicas o propio venres do desfile nas que responsables de recursos humanos de distintas empresas de moda entrevistaranse co alumnado.
Unha das sesións de traballo máis esperadas será a que impartan os días 14, 15 e 16 os dous integrantes de Twee Muizen, Denís e Cris, un taller de 'tufting gun', unha ferramenta que permite crear pezas de la de gran formato en pouco tempo.
Lola Dopico destacou tamén a sesión de Rafafans, especialistas en colaxe creativos dixitais no mundo da moda, que se celebrará os días 14 e 15.
Tamén haberá por segundo ano consecutivo un taller con Félix de Martín, que traballa con volume e proporciona ferramentas e recursos que axudan no traballo de deseño creativo.
Os talleres complétaos Noelia López, que falará sobre retoque dixital, unha parte fundamental do proceso de creación de contidos fotográficos no mundo da moda.
Así mesmo, Lola Dopico quixo insistir na importancia das mesas redondas que se celebrarán en Santa Clara nas que ex alumnos desta titulación específica do campus pontevedrés mostran as súas experiencias no mundo da moda.
O 16 de novembro ás 19.30 horas explicarán os seus proxectos persoais tres ex alumnos: Raquel Suárez, fundadora de Suagongo; Gabriel Nogueira, de Rubearth; e Erica Oibiña, de Ik Studio.
Ademais, o 17 de novembro á mesma hora haberá en Santa Clara unha mesa redonda sobre "un territorio que profesionalmente está a crecer moito", abrindo posibilidades laborais ás persoas formadas neste centro, a dirección de arte como campo profesional. Falarán sobre iso María Cuntín, Melania Freire e Xoana Medrano, tamén ex alumna da especialidade pontevedresa.