O Concello de Pontevedra remitirá nos próximos días á Xunta de Galicia o documento inicial de modificación do Plan Xeral de Ordenación Urbana (PGOU) que sentará as bases, segundo o concelleiro de Urbanismo, Antón Louro, para regular de forma definitiva a instalación de crematorios no término municipal e que se suscita, dixo, para dar resposta á "enorme alarma social" creada pola avalancha de solicitudes para a súa construción.
"ÿ unha proposta enormemente respectuosa co ordenamento xurídico vixente, feita con rigor, con seriedade e con vontade de resolver o problema", sinalou Antón Louro. Un documento do que destacou "ven a cubrir o baleiro normativo existente non só no Plan Urbanístico, senón na normativa autonómica e estatal", e que espera que sexa aprobada por consenso de todas as forzas políticas municipais.
En liñas xerais, esta modificación do PGOU prohibirá a instalación de crematorios en todas as zonas residenciais do municipio. Específicamente en chan urbano, núcleo rural ou chan urbanizable, con algunhas excepcións. Tamén se prohibe en chan rústico de especial protección, cando así o estableza a normativa autonómica ou por incompatibilidade cos valores protexidos.
E onde se poderían situar entón? Propóñense tres ubicacións: Son tres: cemiterios, tanto existentes como novos; polígonos industriais para industrias contaminantes e chan rústico. En calquera dos tres casos, os edificios dos crematorios que se fagan dentro destas tres posibles localizacións deberán ter unha distancia mínima de 50 metros, por analoxía coa regulación autonómica, respecto de calquera parcela residencial ou comercial.
Ademais, no caso dos posibles crematorios en chan rústico, ademais da mesma distancia cautelar de 50 metros, medidos desde o peche exterior da parcela prevista para o crematorio, deberán aprobar previamente un Plan Especial de Infraestructuras e Dotacións (PEID) que proxecte e garanta o adecuado acceso rodado público e a conexión con todas as redes públicas de servizos, e contar cos informes favorables da Xunta de Galicia.
PLAZOS DE TRAMITACION
En canto á tramitación pendente, Louro destacou que o documento de inicio será remitido xa á Consellería de Medio Ambiente, Territorio e Infraestruturas para a emisión do informe urbanístico previo á aprobación inicial e para que decida se é necesario sometelo á avaliación ambiental estratéxica. A Xunta disporá de dous meses para contestar, tras o cal será aprobado inicialmente polo pleno municipal.
Frearíanse así todos os crematorios previstos salvo o de Funespaña, proxectado para as inmediacións do actual cemiterio de San Mauro
Con esta aprobación inicial finalizará o prazo dun ano de suspensión de licenzas. Comezará entón un novo prazo de suspensión máxima por un período de dous anos para as zonas nas que cambia a clasificación urbanística dos terreos, tras o cal someterase a información pública e ao trámite de presentación de alegacións. Tan só quedaría entón a aprobación provisional do pleno e, finalmente, a aprobación definitiva da Xunta de Galicia.
Resumindo, segundo o edil socialista, trala aprobación inicial abriríase un novo prazo de dous anos, ata finais de 2015, "que afectaría a todos os crematorios previstos sobre solo urbano, urbanizable ou núcleo rural e que, en cambio, non afectaría aos previstos en cemiterios, polígonos industriais ou solo rústico". ÿ dicir, frearía todos os crematorios previstos salvo o de Funespaña, proxectado para as inmediacións do actual cemiterio de San Mauro.
Del recordou Antón Louro, aprobáronse varios trámites no Concello de Pontevedra, "por unanimidade de toda a corporación e sen recibir ningunha alegación dos veciños". Unha vez se levante a suspensión cautelar coa aprobación da modificación inicial, sería o único que podería retomar o seu proxecto ao estar previsto nun dos tres supostos de chan aceptados pola futura normativa.
O PP CRE QUE SE INCUMPRE UN ACORDO PLENARIO
Pola súa banda, o concelleiro do Partido Popular, Ricardo Aguilar, aínda que non quixo entrar no fondo do documento "hasta que lo hayamos estudiado en profundidad", criticou que de entrada "se incumple un acuerdo plenario", ao recordar que inicialmente marcábase unha franxa de distancia entre os crematorios e as zonas residenciais duns 500 metros, agora rebaixados a 50 metros.
Ademais, tras reiterar na súa denuncia de que non se lle facilitou a tempo o expediente para analizalo, Ricardo Aguilar sinalou que a súa formación sospeita que se trata dunha "ordenación a la carta", xa que esta modificación paralizará todos os crematorios menos un, o de Funespaña. "Da la sensación de que desbloquean este asunto para que Funespaña, que cumple todos los requisitos, pueda seguir con adelante con su proyecto".
Neste sentido, o edil popular criticou que se tardou seis meses en redactar este documento de aprobación inicial do PGOU que, sumado ao tempo de resposta da Xunta e aos dous anos máis ata a súa aprobación definitiva, "nos llevará más allá de las próximas elecciones municipales". Cre Aguilar que o goberno municipal "están utilizando los tiempos y posponen de forma hábil este asunto" con fins electorais.