Ana Cedeira, número dous de Pontevedra Alternativa (POAL) e presidenta do comité de empresa de oficinas de Ence, declaraba xunto a Carlos Fontán, candidato á alcaldía, e Pedro Estévez, secretario xeral, que van poñer "deberes" a Ence, despois da resolución do Tribunal Supremo que establece a permanencia da factoría ata 2073 na ría pontevedresa.
Demandan como grupo político unha visita ás instalacións para coñecer de primeira man o proceso produtivo. Desde esta formación indican que "Pontevedra Alternativa entende que a localización da planta non é a idónea e que hai cidadáns que non apoian a súa estadía, o cal comparten e respectan".
Ana Cedeira alerta, ademais, dos deberes que Ence deberá cumprir coa sociedade: "estamos en disposición de facer certas esixencias á fábrica para que mellore a vida dos nosos cidadáns", explicou. Pide o peche do ciclo de auga coa eliminación da dependencia do Lérez e o seu abastecemento; recuperar o investimento en infraestrutura; e crear emprego local.
Ademais, en relación á política ambiental esixen "o cumprimento dos estándares" e tamén "investigación para mitigar o impacto na contorna da fábrica". Esta nova agrupación política expresa que "calquera indicio de falta de investimento ou de vertedura podería cambiar o noso posicionamento de forma radical".
Pola súa banda, Fontán tamén inclúe compromisos realizados pola pasteira anos atrás como a creación da planta de biomasa e dun centro de I+D+i en Lourizán. "Aínda que o PP se poña de perfil e non o reclame, Pontevedra Alternativa si o fará", indica.
Estévez tamén se expresou en leste mesmo sentido "agora que temos unha obriga social e xurídica de convivencia coa fábrica temos que aproveitarnos dela". O secretario xeral felicitou, ademais, ao persoal e demandou unha relación de "comunicación aberta e proactiva" entre a empresa e a cidadanía.