O goberno municipal teno claro. Se a Xunta de Galicia acepta a petición de Elnosa de tramitar un proxecto sectorial de incidencia supramunicipal para poder continuar en Lourizán, sería "unha nova traizón" a Pontevedra. Por iso é polo que, segundo Carme da Silva, o Concello vai a opoñerse a esta declaración "con todos os medios dos que dispón".
A tenente de alcalde, tras coñecerse os plans da empresa, asegurou que o Concello recorrerá a todo tipo de estratexias administrativas, xurídicas, políticas e sociais "igual que fixemos con Ence", ao entender que esta petición "non se xustifica de ningunha forma".
"Agardemos que a Xunta non se atreva a facelo", engadiu a edil do BNG.
Dá Silva asegurou que Elnosa decidiu realizar este trámite "só para escapar" dunha normativa urbanística municipal "que non cumpría".
Con el demóstrase, matizou, que a empresa e o PP "ata onte" estiveron "enganando" aos traballadores da compañía, asegurándolles que o Concello "tiña algo que dicir" na continuidade da fábrica en Lourizán.
"A chave para que Elnosa poida seguir na ría tena a Xunta e non o Concello", afirmou a tenente de alcalde, que acusou á empresa e ao Partido Popular de utilizar aos traballadores como "arma arroxadiza" por intereses políticos.
Tamén o deputado do BNG, Luís Bará, pronunciouse sobre os plans da empresa e asegurou que esta petición responde a un plan "preconcibido e argallado" entre Elnosa e a Xunta de Galicia para manter a localización da cloreira "en contra da lexislación vixente".
"A Xunta traballa para favorecer intereses privados, como xa fixera con Ence regalándolle 600.000 metros cadrados", dixo Bará.