Ao redor das 09.00 horas orixinábase un incendio na contorna da zona da Puntada, na parroquia de San Salvador, no Concello de Poio, nun espazo arbóreo, lindeiro coa ría de Pontevedra.
O intenso fume obsérvase desde distintos puntos da ría e chama a atención da cidadanía de Pontevedra, ao atoparse nas proximidades da ponte da autoestrada AP-9 que cruza a ría, entre Poio e Pontevedra.
Na zona atópanse traballando diferentes efectivos, entre os que se atopan sete voluntarios de Protección Civil de Poio cun vehículo de intervención e motobomba, para tentar extinguir totalmente as lapas e evitar a súa expansión cara ás vivendas que se atopan nas proximidades. Nesta xornada rexístranse fortes ventos do nordeste con forza de 4 a 5 pola mañá.
Arredor das 11.30 horas, os servizos de extinción consideran que o lume está controlado. Ata o lugar desprazáronse, ademais de Protección Civil de Poio, dúas brigadas de extinción da Xunta de Galicia, efectivos da Policía Local e da Garda Civil.