O Marín Futsal naufraga ante un imparable Burela

Sen sorpresas no derbi galego entre Marín Futsal e o Burela disputado este sábado na Raña.

O conxunto local caeu por 1-7 nun partido no que non tivo ningunha opción.

O partido foi de completo asedio e dominio do conxunto da Mariña, que obrigaba ao Marín Futsal a empregarse ben a fondo para defender e aguantar coa portaría a cero.

Con todo, o equipo marinense resistiu tan só catro minutos, sucumbindo ante as primeiras rotacións dun Burela que quería gañar custe o que custe e adiantábase tras un envío de Cami ao segundo pau que cazou Patri Ortega.

Continuaron as visitantes en busca do segundo tanto, pero non foi até despois do intermedio cando chegou a choiva de goles.

Antes, ao fío do descanso, o Marín puido igualar cun man a man de Carolina Bravo con Ana Eliza que a gardameta desviou a córner

Tras o paso polos vestiarios, o guion do partido apenas cambiou e o Burela continuou co seu dominio, aínda que esta vez se viu reflectido no marcador.

Pasado o minuto 25 e con certo suspense, Emily Marcondes sacou un centro chute desde a dereita que acabou coándose no interior da portaría dun Marín Futsal que non deixaba de sufrir.

De feito é que, segundos despois do 0-2, o Burela puxo máis terra polo medio despois dunha rápida circulación entre Emily, Antía e Patri Ortega que esta última rematou á rede desde dentro da área.

Estábaselle facendo demasiado longo o encontro ao equipo marinense, que vía como as visitantes sacaban petróleo practicamente de cada xogada.

Unha delas foi tras un saque de banda en campo do Burela que apenas tiña perigo. Con todo, Dinha recibiu en longo e cun maxistral chapeu recortou a Patri Corral, deixou botar o esférico e enganchouno para aloxalo na escuadra da portaría local e subir o 0-4 ao marcador.

A falta de seis minutos para a conclusión, Cami rematou soa desde o frontal un pase de Emily Marcondes para anotar o quinto tanto e, pouco despois, tras unha gran combinación entrePatri Ortega e Antía, esta última fixo o 0-6.

O cadro visitante cargouse con seis faltas cando restaba minuto e medio, e Carolina Bravo tivo nas súas botas a ocasión para facer o gol da honra, pero o seu disparo desde os dez metros foise fóra.

Pouco despois e aproveitando o xogo de cinco, Guida volveu probar desde o dobre penalti e, esta vez, Café colleu o rexeite para facer 1-6.

Non quedaba tempo para moito máis, pero si para que as da Mariña anotasen o último tanto. Patri Ortega roubou o esférico, e desde cancha propia e a portaría buxán encargouse de facer o definitivo 1-7.

Consulta a acta neste enlace