Os socialistas contaron este xoves co reforzo da ministra de Ciencia, Diana Morant, que participou no mitin que a candidatura de Iván Puentes organizara, como evento central da súa campaña, na céntrica Praza da Peregrina.

A ministra, que centrou gran parte da súa intervención en destacar o avance que a ciencia experimentou en España durante o goberno de Pedro Sánchez, puxo en valor o papel como investigador do candidato socialista á Alcaldía.

"Iván, como buen investigador, es una mente inquieta y brillante", sinalou Morant, que destacou a xestión do seu compañeiro para atraer a Pontevedra "la mayor financiación de la historia de Pontevedra", 25 millóns para a transformación verde da cidade.

O "voto útil y de progreso" neste 28 de maio, segundo a titular de Ciencia, é que contribúa a fortalecer a "unión" do PSOE en Pontevedra co PSOE no Goberno central. 

Ante iso, Diana Morant apelou a refugar "viejas recetas" e apostar polo candidato socialista que, ao seu xuízo, representa o "futuro y progreso" para Pontevedra e está preparado para liderar os desafíos aos que terá que enfrontarse a cidade.

"Relanzar Pontevedra para que esté más preparada para el futuro es lo que sabemos hacer los socialistas", sentenciou.

Durante a súa intervención, Iván Puentes sostivo que o PSdeG-PSOE representa o " voto útil" para os cidadáns que "teñen fame de cambio". Son, dixo, a "única garantía" para que "sen destruír nada do moito e bo que se fixo" a cidade avance "en novos retos".

"Só hai dúas opcións reais de goberno: o BNG, para que todo siga igual, ou un PSOE máis forte, liderando ao novo goberno municipal, para evolucionar o noso modelo de cidade e darlle un meneo a Pontevedra", subliñou o candidato socialista.

Puentes apelou aos votantes que "desexan unha Pontevedra con futuro" para que apoien ao seu partido e poder impulsar a transformación da cidade "desde a ilusión, o sentido común, a tranquilidade, a solvencia e a seguridade".

Esta campaña electoral, sostivo o aspirante á Alcaldía, serviu para "quitar as máscaras" cun BNG centrado nunha "campaña do medo" e un Lores "taciturno e inseguro", o que identifica como un síntoma dun proxecto político "totalmente esgotado".

A de Rafa Domínguez, pola súa banda, foi segundo o socialista unha campaña "apocalíptica" que foi anunciando "destrucións e demolicións por todas partes" e coa que "ninguén se pode sentir identificado". Ademais, considera que foi "escasa en ideas"

Iván Puentes insistiu en que o PSdeG-PSOE está "moi orgulloso" da transformación experimentada por Pontevedra, da que "só renega Rafa Domínguez".

"Pero chegou o momento de falar de algo máis que de peonalización, cemento e coches e de situar a Pontevedra no tren das grandes cidades europeas", reivindicou o candidato socialista, para dar resposta aos retos que afrontará a cidade nos próximos anos.

Só o PSOE, sentenciou, ofrece a "seguridade e tranquilidade" para preservar os avances destas dúas décadas sumada á "ilusión, ganas e experiencia de xestión" para que o actual modelo evolucione e se adapte a eses novos desafíos.

Pantalla completa